Zyrtari rus: Pranimi i Ukrainës në NATO mund të rezultojë në një luftë të tretë botërore
Pranimi i Ukrainës në NATO do të mund të rezultonte në një luftë të tretë botërore, tha të enjten në një intervistë për agjencinë ruse të lajmeve, TASS, nënsekretari i Këshillit të Sigurisë të Rusisë, Alexander Venediktov.
“Kievi është mirë i vetëdijshëm se një hap i tillë do të nënkuptonte eskalim të garantuar për në Luftën e Tretë Botërore. Mësa duket, kjo është ajo në të cilën ata po llogarisin – për të krijuar zhurmë informuese dhe për ta tërhequr vëmendjen te vetja edhe një herë”, citohet të ketë thënë zyrtari rus.
Ai gjithashtu e përsëriti pozicionin e Rusisë se Perëndimi, duke e ndihmuar Ukrainën, po jep shenjë se “ata janë një palë e drejtpërdrejtë në konflikt”, raporton agjencia “Reuters”.
Presidenti ukrainas, Volodymyr Zelensky, njoftoi papritmas në fund të shtatorit se vendi i tij ka aplikuar për anëtarësim në NATO, pasi homologu rus, Vladimir Putin, zhvilloi një ceremoni në Moskë për t’i shpallur territor rus katër rajone ukrainase të pushtuara pjesërisht nga Rusia.
