Truss tashmë më e papëlqyer se Boris Johnson

Kryeministrja e re britanike Liz Truss është tashmë më e papëlqyeshme se paraardhësi i saj Boris Johnson ose ish-lideri i Laburistëve Jeremy Corbyn, sipas një sondazhi të YouGov të publikuar sot. Vetëm 14 për qind e britanikëve tani kanë një përshtypje pozitive për kryeministren, që është dukshëm më pak se 26 për qind në sondazhin e mëparshëm të kryer më 21 dhe 22 shtator.

Pothuajse tre të katërtat, më saktë 73 për qind e britanikëve, tani kanë një opinion negativ për punën e kryeministres. Më shumë se gjysma, 55 për qind e tyre, kanë një opinion shumë negativ për Trussin. Ky është një vlerësim më i keq se ai i Johnson ose Corbyn. 1751 të anketuar morën pjesë në sondazhin e YouGov më 1 dhe 2 tetor.

Premtoi të tërhiqte Britaninë nga një periudhë e vështirë

Liz Truss u zotua të mërkurën se do ta nxjerrë vendin nga një periudhë e vështirë përpara, duke folur për "ditë të stuhishme përpara" ndërsa ajo parashtronte planet e saj për të nxitur rritjen ekonomike. Në fjalimin e saj në konferencën konservatore, e cila është shënuar nga trazira dhe ndarje të brendshme, kryeministrja pranoi se politikat e saj do të shkaktonin përçarje, por këmbënguli se "status quo nuk është një opsion".

"Ne duhet të qëndrojmë në kurs". shtoi ajo. Truss e mbajti fjalimin pas trazirave financiare dhe politike mbi mini-buxhetin e diskutueshëm të qeverisë. Përpjekja për të ulur taksat me 45 miliardë paund dhe për të rritur shpenzimet e qeverisë ka shkaktuar tronditje në tregje dhe mund të shkaktojë humbjen e partisë në zgjedhje. /Nacionale/