SHBA: Gjeneralët rusë diskutuan për luftën bërthamore, Putin nuk ishte në takim

Udhëheqësit e lartë ushtarakë rusë diskutuan kohët e fundit se kur dhe si Moska mund të përdorë armët taktike bërthamore në Ukrainë, sipas zyrtarëve amerikanë.

Presidenti rus Vladimir Putin dyshohet se nuk ka marrë pjesë në bisedën e lartpërmendur, por fakti që kreu i ushtrisë po e diskutonte atë, shqetësoi administratën Biden. Domethënë, tregon se gjeneralët rusë janë të frustruar nga dështimet në fushën e betejës dhe se kërcënimet e Putinit për përdorimin e armëve bërthamore nuk janë vetëm fjalë boshe.

Zyrtarët amerikanë, megjithatë, deklarojnë se deri më tani nuk kanë parë asnjë provë që Rusia të lëvizë armë bërthamore ose të ndërmarrë përgatitje të tjera taktike për një sulm të tillë, shkruan The New York Times.

Putin: Nuk e shohim të nevojshme

Pentagoni vlerëson se Rusia ka një rezervë prej deri në 2000 armë taktike bërthamore. Kjo lloj arme ka më pak fuqi se raketat balistike dhe përdoret në rreze më të shkurtër.

Informacioni për bisedën e komandës ruse mbërriti në të njëjtën kohë kur Moska akuzoi Ukrainën për planifikimin e përdorimit të të ashtuquajturës bombë e pistë - një eksploziv me material radioaktiv. Kjo u pasua nga një sërë kontaktesh midis zyrtarëve amerikanë dhe të tjerë perëndimorë dhe homologëve të tyre rusë, duke përfshirë dy telefonata midis Sekretarit të Mbrojtjes të SHBA-së Lloyd J. Austin dhe Sergei Shoigu të Rusisë.

Megjithëse rreziku i përshkallëzimit të mëtejshëm mbetet shqetësues, zyrtarët e administratës së Biden thonë se bisedat telefonike midis homologëve perëndimorë dhe rusë në fund të muajit të kaluar lehtësuan disi frikën për tensionet bërthamore.

Kjo u ndihmua nga fjalimi i Putinit të enjten e kaluar, në të cilin ai mohoi se Moska po përgatitej të përdorte armë bërthamore në Ukrainë.

"Ne nuk e shohim nevojën për këtë. Nuk ka kuptim, as politikisht dhe as ushtarakisht," tha Putin në atë kohë. /Nacionale/