Scholz i kërkon BE-së të thellojë unitetin përballë kërcënimit rus
Kancelari gjerman, Olaf Scholz, u ka kërkuar të hënën vendeve të BE-së të tregojnë më shumë unitet dhe t'i japin fund "bllokadave egoiste" në fusha të tilla si politika e jashtme, në mënyrë që ta kthejnë bllokun në një "aktor gjeopolitik" që mund të veprojë më me forcë në skenën globale.
Në një shkrim të botuar në gazetën gjermane Frankfurter Allgemeine Zeitung, Scholz ka njoftuar gjithashtu se qeveria gjermane do të "bënte propozime konkrete në muajt e ardhshëm" për të forcuar BE-në në fushat e migracionit dhe politikës së mbrojtjes, si dhe sovranitetin teknologjik dhe qëndrueshmërinë demokratike - pa dhënë detaje të mëtejshme për këto plane reformash.
"Bashkimi Evropian është antiteza e gjallë e imperializmit dhe autokracisë," shkroi Scholz, duke argumentuar se "kjo është arsyeja pse ai është një gjemb në këmbë për sundimtarët si Putin".
Kancelari po ashtu ka vlerësuar bllokun për marrjen e "vendimeve historike në muajt e fundit" duke miratuar sanksione të gjera kundër Moskës dhe duke treguar unitet përballë sulmit të Rusisë ndaj Ukrainës. Por ai dha edhe paralajmërime kundër "përçarjes së përhershme, mospajtimit të përhershëm midis shteteve anëtare" për disa çështje që kanë dobësuar aftësinë e Evropës për të luajtur një rol më të madh në skenën ndërkombëtare.
Ai tha se, vendet anëtare duhet të kapërcejnë ndarjet e tyre.
