‘Sa më shpejt’: Escobar flet për afatet e marrëveshjes Kosovë-Serbi
I dërguari i Posaçëm i Shteteve të Bashkuara të Amerikës, Gabriel Escobar, është pyetur nëse ka një afat për arritjen e marrëveshjes mes Kosovës dhe Serbisë.
Në një diskutim në “Atlantic Council”, Escobar ka deklaruar se kjo duhet të bëhet “sa më shpejt që është e mundur”.
“Sa më shpejt që është e mundur. Mendoj që nuk e ndihmon askënd të ketë një konflikt të ngrirë në rajon, ky është i vetmi konflikt i ngrirë në rajon”, ka thënë ai.
Diplomati amerikan po ashtu ka theksuar se Asociacioni i Komunave me Shumicë Serbe duhet të bëhet dhe se “do të bëhet”.
"Është një dispozitë ligjërisht e detyrueshme. Është ligjërisht e detyrueshme për Serbinë, për Kosovën dhe për BE-në, dhe pikërisht për shkak se ne mbështesim dialogun, është edhe detyrimi ynë. Pra, po, duhet të zbatohet dhe do të zbatohet.” – tha ai.
Pyetur nëse ShBA-ja mund ta marrë drejtimin e dialogut mes dy vendeve, Escobar tha se nuk mendon që një gjë e tillë do të ndodhë.
“Nuk mendoj që (ShBA-ja) do ta udhëheqë dialogun. Por nëse shikon historinë tonë, bashkëpunimin me BE-në, ne kemi zgjidhur shumë kriza dhe e kemi parandaluar dhunën në rajon”, tha ai.
