Reagimi i Dimal Bashës ndaj Gjykatës Kushtetuese, Hasani: “Ky i vetëquajturi akoma Kryetar i Kuvendit”
Enver Hasani, ish-Kryetar i Gjykatës Kushtetuese është pyetur për deklarimit të Dimal Bashës, deputet i zgjedhur i Vetëvendosjes, për aktgjykimin e GjK-së.
Hasani vëren se Dimal Basha nuk është kryetar i Kuvendit të Kosovës sikundër se siç e quan veten “akoma”.
“Sikundër dihet, në Kosovë deputetët dhe prononcimet e tyre për çështjet me karakter politik sistemik nuk janë mendime dhe vlerësime të tyre të lira, por të liderit të partisë. Kjo ka qenë gjithmonë e ditur edhe te partitë e tjera dhe, në rastin konkret, është edhe më e theksuar. Mënyra se si shprehet zotëri Basha, duke u vetëquajtur akoma kryetar i Kuvendit të Kosovës, paraqet shenjë se partia në pushtet do të vazhdojë me praktikën e rrënimit të rendit kushtetues, shantazhit dhe kërcënimeve ndaj gjyqtarëve dhe të gjithë atyre që nuk mendojnë se pakica serbe duhet të nxirret jashtë sistemit kushtetues”, tha Hasani për Gazetën Express.
