Presidentja Osmani pret në takim UD të Kryeprokurorit të Shtetit e Kryesuesin e KPK-së, kryetemë veprat kundër integritetit seksual e vettingu

Presidentja e Republikës së Kosovës Vjosa Osmani, ka pritur sot në takim ushtruesin e detyrës së Kryeprokurorit të Shtetit, Besim Kelmendi, dhe Kryesuesin e Këshillit Prokurorial të Kosovës, Jetish Maloku.

Sipas komunikatës së Presidencës, aty u diskutua për intensifikimin e punës së Prokurorisë, në parandalimin, ndjekjen penale e ndëshikimin e veprave penale kundër integritetit seksual.

“Në këtë takim u diskutua për nevojën e domosdoshme dhe urgjente të intensifikimit të punës së Prokurorisë dhe bashkërendimit të institucioneve të drejtësisë në parandalimin, ndjekjen penale dhe ndëshkimin adekuat të kryesve të veprave penale të dhunimeve, ngacmimeve seksuale dhe veprave penale kundër integritetit seksual.

Presidentja kërkoi nga KPK-ja dhe u.d. Kryeprokurori që t`i ndërmarrin hapat e nevojshëm për të ashpërsuar këtë luftë dhe për të ngritur kapacitetet e nevojshme që të mundësohet një gjë e tillë. Njëkohësisht, Presidentja u zotua për përkrahjen e të gjitha institucioneve të drejtësisë dhe atyre ligjzbatuese në ndërmarrjen e këtyre hapave.” Thuhet në komunikatë

Sipas të njejtes komunikatë, aty gjithashtu u rikonfirmua përkrahja e presidentes për nismën e vetingut, duke iu bërë thirrje të gjith akterëve që të bashkëpunojnë, me grupet punuese për këtë nismë.

“Presidentja gjithashtu rikonfirmoi përkrahjen e saj për nismën për veting dhe reforma në drejtësi, si rruga më e nevojshme dhe e duhur në drejtim të garantimit të një sistemi gjyqësor e prokurorial me integritet dhe profesionalizëm. Sipas Presidentes Osmani, integriteti dhe profesionalizmi i prokurorëve dhe gjyqtarëve në sistemin e drejtësisë është shtyllë kryesore e sundimit të ligjit në vendin tonë. Në këtë drejtim, veçanërisht tani pas marrjes së dritës së gjelbër nga Komisioni i Venecias, Presidentja tha se vetingu është ndër proceset reformuese më të rëndësishme në vendin tonë në drejtim të ndërtimit të një sistemi kredibil prokurorial e gjyqësor dhe kthimit të besimit të qytetarëve në drejtësi. Në këtë kontekst, Presidentja u bëri thirrje atyre për të bashkëpunuar me institucionet përgjegjëse në zhvillimin e këtij procesi të dobishëm si për prokurorinë ashtu edhe për qytetarët e vendit tonë, nëpërmjet pjesëmarrjes aktive në grupet punuese duke ofruar sugjerimet e tyre konkrete për avancimin e këtij procesi.” Thuhet tutje në Komunikatë