"Për një punë si mjek, aplikuan 10 — 9 shqiptarë dhe 1 serb, ky i fundit u punësua", Kurti ankohet për diskriminim e shqiptarëve në Luginë

Kryeministri i Kosovës, Albin Kurti, në një sërë postimesh në “X”, ka shkruar për politikat diskriminuese të shtetit serb ndaj shqiptarëve të Luginës së Preshvës, Medvegjës dhe Bujanocit.

Kreu i ekzekutivit ka thënë se banorët e Preshevës dhe Bujanocit detyrohen të ndërrojnë qytetin për nevoja mjeksore si pasojë e mungesës së spitaleve në këto komuna të banuara me shumicë shqiptare.

“As qyteti i Preshevës dhe as Bujanoci në Serbi, popullsia e të cilëve është kryesisht shqiptare etnike (~70%), nuk kanë spital. Banorët detyrohen të shkojnë në një qytet të afërt, në Vranja, ku nga 700 punonjës nuk ka asnjë shqiptar.” – ka shkruar Kurti.

Si fakt i rëndë i diskriminimit masiv ndaj shqiptarëve atje, Kurti mori si shembull një konkurs pune për mjek si argument të qartë të diskriminimit ndaj shqiptarëve.

“Për një punë të hapur së fundi si mjek, aplikuan 10 — 9 shqiptarë dhe 1 serb. Ky i fundit u punësua. Ky është vetëm një shembull i diskriminimit antishqiptar, i cili përfshin gjithashtu privimin e fëmijëve nga librat shkollorë, censurimin e shprehjes artistike dhe spastrimin etnik me mjete administrative.” - ka thënë Kurti.

Ai ka shkruar edhe për heqjen e 6000 shqiptarëve etnikë nga lista e votuesve, duke i pamundësuar kështu të drejtën e votës, punësimit, blerjes së pronave, etj.

“6000 shqiptarë etnikë (siç raporton Dr. Flora Ferati-Sachsenmaier) janë hequr ilegalisht nga listat e votuesve dhe për këtë arsye nuk mund të votojnë, të punojnë, të blejnë prona apo t'i dërgojnë fëmijët e tyre në shkollë.” - shkroi Kurti.

“Ne nuk mund të diskriminojmë në respekt. Komuniteti shqiptar në Serbi ka të njëjtën vëmendje si komuniteti serb në Kosovë. Kjo është vetë premisa e të drejtave të pakicave – se përkatësia etnike nuk mund dhe nuk duhet të përcaktojë vlerën tuaj ose mungesën e saj në një vend.” - tha ai në fund.