Pasi shkarkoi tre-katër drejtorë, Bulliqi çertifikohet si kandidat për kryetar të VV-së në Llap
Shpejtim Bulliqi edhe zyrtarisht është kandidat për kryetar të degës së LVV-së në Podujevë, deri më tani, i vetmi.
Këtë e ka bërë të ditur vetë ai përmes një shkrimi në Facebook, ku tha se është çertifikuar për kandidim.
“Krahas punës dhe detyrave që na presin, jam shumë i vetëdijshëm për përgjegjësinë që po e kërkoj, por karshi kësaj përgjegjësie e kam vullnetin e madh dhe përkushtimin maksimal që bashkë me të gjithë aktivistët e anëtarët organizatën tonë ta forcojmë e zgjerojmë, pa u shkëputur asnjëherë nga parimet dhe vlerat e Lëvizjes”, shkroi Bulliqi.
Vlen të theksohet se para një jave, Bedri Macestenës iu refuzua aplikimi që të kandidojë për kryetar të kësaj dege, nën arsyetimin se “nuk është në përputhje me kriteret për pozicionet drejtuese”.
Ky i fundit, kishte deklaruar se mbi 20 aktivistë janë të gatshëm të largohen nga partia, në rast se atij i mohohet e drejta e kandidimit.
Bulliqi në anën tjetër, ka shkarkuar disa drejtorë komunalë, së fundi edhe drejtorin e Inspeksionit, Besnik Mulliqi.
Deri te ky vendim, dyshohet se kishte ardhur për shkak të ndërtimeve përreth Batllavës.