Mushkolaj kërkon ndjekje penale për personat prapa profileve të rreme: Duhet hetuar edhe urdhërdhënësit e tyre

Analisti Imer Mushkolaj ka kërkuar që personat që përdorin profile të rreme në rrjetet sociale për të sulmuar dhe linçuar kritikët e pushtetit të ndiqen penalisht.

Sipas tij, veprimtaria e këtyre profileve nuk kufizohet vetëm në fyerje, por përfshin edhe sulme, shantazhe dhe nxitje të urrejtjes e të përçarjes në shoqëri.

“Personat të cilët, fshehur pas profileve të rremë në rrjete sociale, terrorizojnë shoqërinë e linçojnë kritikë të pushtetit, duhet ndjekur penalisht”, ka shkruar Mushkolaj.

Ai ka shkruar se në rrjetet sociale vazhdojnë të veprojnë shumë profile të ngjashme, të cilat përdoren për të shënjestruar zërat kritikë.

“‘Lule’ të shumta vazhdojnë të shajnë, të sulmojnë, të shantazhojnë dhe të nxisin urrejtje e përçarje”, shkroi ai.

Mushkolaj ka kërkuar që hetimet të mos përqendrohen vetëm te personat që administrojnë profilet e rreme, por edhe te ata që mund të qëndrojnë prapa veprimtarisë së tyre.

“Duhet hetuar jo vetëm ata, por edhe urdhërdhënësit e tyre”, ka shkruar Mushkolaj.