Joseph: Vizita e shefit të CIA-s, sinjal i brengës që ka Uashingtoni për tensionet në Ballkan
Profesori amerikan Edward P. Joseph, ka vlerësuar se vizita në Kosovë dhe disa shtete të Ballkanit e shefit të CIA-s, William J. Burns, është sinjal i brengës që ka Uashingtoni për tensionet në Ballkan.
“Kjo nuk është një vizitë e lumtur, nuk është një lloj vizite e nivelit të Bill Clintonit, Hillary Clintonit, ndonjë sekretari, siç është sekretari Blinken, ose diçka e ngjashme. Kjo nuk është diçka e mirë, sepse William J. Burns, për momentin është i përshirë shumë seriozisht në negociatat për ndaljen e luftimeve ndërmjet Izraelit dhe Hamasit dhe ky është top prioritet kryesor për administratën e SHBA-ve. Për atë që të vjen në Ballkan, për të vizituar Kosovën, Serbinë, Bosnjën, ndoshta do të ndalet edhe në Bullgari, edhe në Maqedoni të Veriut”, tha Joseph për Lajmet e Fundit në RTK.
Profesori amerikan tha se shefi i CIA-s, vjen në Ballkan, sepse Uashingtoni i sheh këto pika vështirësish e problemesh.
“Kjo nuk është vizitë e lumtur. Duhet të jemi shumë të qartë për këtë. Është një vizitë fatkeqe dhe një sinjal i brengës në Uashington lidhur me tensionet dhe potencialin e një lloj konfrontimi në Ballkan”, tha ai për Lajmet e Fundit në RTK. Joseph tha se askush nuk e din se çfarë mesazhi ka sjellë shefi i CIA-s, William J. Burns.
