“Izolime të kulmeve, ndërrim të dyerve dhe dritareve” - Rizvanolli paralajmëron masa ndihmëse nga viti i ardhshëm

Ministrja e Ekonomisë, Artane Rizvanolli, në një konferencë për media, ka dhënë detaje, se si kjo ministri, do të mbështesë në vitin e ardhshëm projektet për efiçiencë në energji.

Në mesin e masave, ajo ka përmendur, subvencionimin e izolimeve të kulmeve, ndërrimin e dyerve dhe dritareve etj.

“Ne qysh nga viti në vijim do të fillojmë me skema më të mëdha të efiçencës së energjisë që përfshijnë termoizolime, izolime të kulmeve, ndërrim të dyerve dhe dritareve, por edhe pajisje eficente për ngrohje siç kemi bërë sivjet. Plani është që gjatë vitit tjetër 30 milionë euro së paku t’i investojmë në efiçencë të energjisë në programe të reja e kam fjalën, përveç programeve ekzistuese që janë dhjetëra miliona në programet e efiçencës në ndërtesa publike”, tha ministrja Rizvanolli.

Rizvanolli më tutje u shpreh se janë duke punuar në dizajnimin e kësaj mase.

“Ne si Ministri e Ekonomisë në bashkëpunim me Fondin e Efiçiencës, por edhe Agjensinë e Efiçiencës së Energjisë dhe me të gjithë partnerët e tjerë, por edhe Organizatat Ndërkombëtare që punojnë në Kosovë, jemi duke punuar në dizajnimin e kësaj mase”, u shpreh tutje ajo.