Imri Ahmeti pas deklaratave të Lumir Abdixhikut: Kah kjo kulturë e fyerjeve, linçimeve dhe akuzave?
Imri Ahmeti nga Lidhja Demokratike e Kosovës ka thënë se imponimi dhe linçimi nuk janë parime të funksionimit të kësaj partie.
Pas deklaratave të Lumir Abdixhikut ndaj gjashtëshes së kësaj partie që doli kundër Bekim Sejdiut për president, ai ka pyetur se “kah po vjen kjo kulturë e fyerjeve, linçimeve dhe akuzave”.
“Kah kjo kulturë e fyerjeve, linçimeve dhe akuzave? Kjo nuk është trashëgimi, as vlerë e jona.
Sepse LDK-ja i përket vlerave të respektit, dialogut dhe mirëkuptimit, njerëzve që e kanë ndërtuar e mbajtur gjallë, si dhe çdo qytetari që beson në këto vlera.
Ajo nuk ndërtohet me grusht, me zë të ngritur apo me ton të lartë. Kjo nuk i shkon për fytyrë LDK-së dhe nuk është mënyra se si është ndërtuar historia e saj.
Shtrati dhe bazamenti brenda të cilit lindi, u zhvillua dhe mbijetoi LDK-ja në rrethana të ndryshme, nuk mund të tjetërsohen në kopje të asnjë modeli tjetër politik. LDK-ja është e veçantë dhe pikërisht këtë veçanti duhet ta ruajmë.
Është koha për më shumë dialog, mirëkuptim dhe më shumë respekt për njëri-tjetrin”, ka thënë ai.
