Protesta në Gjakovë për të moshuarën, flet e bija: Ju lus për drejtësi, nana ka shku atje për kujdes më të mirë

Në qytetin e Gjakovës ka filluar protesta pas sulmit nga infermieret në Shtëpinë e të Moshuarve në Pejë ndaj së moshuarës.

Më mesin e atyre që kanë dalë të kërkojnë drejtësi, padyshim se janë edhe e bija e së moshuarës.

Ajo ka kërkuar drejtësi dhe vetëdijesim nga institucionet.

“Ju kisha lutë që të ketë drejtësi, të vetëdijesohen të gjitha institucionet se mama ka shku atje për një kujdes më të mirë, sepse ka pas nevojë për një kujdes mjekësor, për një përkrahje dhe neve na ka pas mbrapa. Mama nuk e ka vetëm Zhanetën, Milotin dhe Taulantin. Unë çka pash sot është se mama ju paska krejt juve” ka thënë ajo.

Protesta është thirrur nga organizata “Krimet e Luftës” në Gjakovë, ndërsa thuhet se protesta do të mbahet në mbështetje të së moshuarës, e cila është nëna e dëshmorit, Taulant Nura.

Para pak ditësh, një video e publikuar tregonte të moshuarën gjersa keqtrajtohej nga një infermiere e që veprimet e kësaj të fundit, përqesheshin nga dy të tjera që regjistronin videon dhe nuk parandalonin keqtrajtimin në fjalë.

Infermiereve në fjalë u është marrë licenca dhe të njëjtat kanë dalë para trupit gjykues. Ato janë dënuar me 30 ditë paraburgim.