Evropa nën valë ekstreme të nxehti, Britania, Franca dhe Spanja në alarm

Evropa Perëndimore dhe Qendrore është përfshirë nga një valë e fortë dhe e zgjatur të nxehti, me paralajmërime të nivelit të lartë në disa vende, ndërsa temperaturat rrezikojnë të thyejnë rekorde për muajin qershor.

Sipas The New York Times, kushtet më të rënda priten në Britani, Francë dhe Spanjë, ku temperaturat mund të arrijnë ose të kalojnë 40 gradë Celsius.

Në Francë, më shumë se gjysma e vendit është vendosur nën alarm të kuq për të nxehtin, niveli më i lartë i paralajmërimit. Parisi mund të arrijë 40 gradë Celsius këtë javë, një nivel i paprecedentë për muajin qershor. Agjencia franceze e motit, Météo-France, raportoi se vendi ka përjetuar natën më të nxehtë që nga nisja e regjistrimeve në vitin 1947. Në disa zona të Francës qendrore dhe perëndimore, temperaturat mund të shkojnë deri në 43 gradë Celsius. Edhe Spanja po përballet me temperatura shumë të larta.

Në Britani, një paralajmërim i nivelit portokalli është në fuqi për pjesën më të madhe të Anglisë dhe Uellsit. Meteorologët britanikë paralajmëruan se temperaturat mund të arrijnë 36 gradë Celsius, duke sfiduar rekordin maksimal të qershorit në vend, prej 35.6 gradësh Celsius, të vendosur në vitin 1976.