Digjen dy kamionë në pronësi të shqiptarëve në Zubin Potok
Afër rrugës që ndan fshatrat Zupç dhe Çabër të Zubin Potokot, dy kamionë të kompanisë shqiptare, të cilët po punonin në një projekt u dogjën tërësisht.
Ata thonë se nuk kishin kërcënime, mirëpo punën nuk do ta fillojnë pa iu garantuar siguria nga Policia e Kosovës.
Hakif Bajrami, menaxheri kësaj kompanie që po kryen disa punime në këtë zonë, është i befasuar me atë se çfarë ka ndodhur, derisa nuk i di motivet e ngjarjes.
“Nuk kemi pasur asnjë telashe, kemi punu normal, sot na kanë lajmëruar edhe na tregun që i kanë djeg”, ka thënë Bajrami.
Por, Bajramin më shumë e shqetëson fakti që në veri të Kosovës nuk po mundën të punojnë lirshëm.
Policia e Kosovës nuk ka dhënë detaje për djegien e këtyre kamionëve.
Në vendin e ngjarjes pasdite kanë shkuar KFOR-i italian, pjesëtarë të së cilit diskutuan me pronarët e kamionëve.
Lokacioni ku janë djegur kamionët është pak metra larg hapësirës ku para disa muajsh Policia e Kosovës u sulmua me armë zjarri./DTV
