Vizita më e rëndësishme e Putinit në Bjellorusi që nga Lufta e Ftohtë: Diçka po përgatitet
Presidenti rus Vladimir Putin mbërriti sot në kryeqytetin e Bjellorusisë dhe solli me vete një delegacion të madh, duke përfshirë ministrin e Mbrojtjes Sergei Shoigu dhe Ministrin e Punëve të Jashtme Sergei Lavrov.
Korrespondentja e Sky News nga Moska, Diana Magnay, deklaron se, duke pasur parasysh përbërjen e delegacionit, kjo është vizita më domethënëse e elitës qeverisëse ruse në Bjellorusi që nga Lufta e Ftohtë.
Sipas deklaratave të para nga Minsku, fokusi do të jetë tek ekonomia, thotë Magnay, ndaj pyet veten pse ministri i Mbrojtjes Sergei Shoigu mbërriti në Bjellorusi. Kjo është vizita e dytë e ministrit rus të Mbrojtjes në Minsk këtë muaj. Stacioni kujton se Shoigu u shfaq papritur në Minsk më 3 dhjetor dhe nënshkroi një lloj marrëveshjeje mbrojtëse me kolegun e tij bjellorus, por detajet e asaj marrëveshjeje mbetën të panjohura.
Kjo sugjeron se diçka po përgatitet, sipas Magnay. Zëdhënësi i Kremlinit, Dmitry Peskov, i cili gjithashtu mbërriti në Minsk, hodhi poshtë spekulimet se ideja e vizitës ishte të bindte presidentin bjellorus Alexander Lukashenko që të përfshihej drejtpërdrejt në luftë. Sugjerime të tilla janë "të pabaza" dhe "budallaqe", tha Peskov. Duhet të kujtojmë se në shkurt të këtij viti, Peskov mohoi vazhdimisht se Rusia po planifikonte të sulmonte Ukrainën.
Në prag të vizitës së Putinit, që ndoshta nuk është rastësi, ushtria bjelloruse njoftoi se kishte përfunduar kontrollet e gatishmërisë luftarake. Në parim, kjo do të thotë se ajo kontrolloi kapacitetet e rezervave të saj ushtarake, të cilat mund të ishin një lloj përgatitjeje për mobilizim. Të paktën kështu ishte në Rusi, kujton korrespondenti nga Moska.
"Roli i Bjellorusisë në luftë mund të ndryshojë në të ardhmen e afërt"
"Forcat e armatosura bjelloruse kanë kryer një sërë stërvitjesh që nga prilli. Kjo është ndoshta periudha më aktive për ushtrinë bjelloruse që nga fundi i Luftës së Ftohtë," tha Konrad Muzyka, një analist sigurie në Rochan Consulting.
"Nëse kësaj i shton verifikimin e informacionit të rezervistëve ushtarakë, thirrjet në zyrat ushtarake për të konfirmuar informacionin e tyre për vendbanimin e kështu me radhë, e gjithë kjo mund të nënkuptojë se roli i Bjellorusisë në këtë luftë mund të ndryshojë në të ardhmen e afërt."
"Lukashenko mund të mos ketë zgjedhje"
Dërgimi i forcave bjelloruse në luftë në Ukrainë do të ishte një lëvizje jashtëzakonisht e papëlqyeshme në mesin e publikut atje dhe mund të nënkuptojë një rrezik të madh për regjimin e Presidentit Lukashenko, sipas korrespondentit të Sky News nga Moska, duke shtuar se Lukashenko thjesht mund të mos ketë zgjidhje. Që nga protestat e mëdha që shpërthyen për shkak të zgjedhjeve të manipuluara në 2020, të cilat ai i shtypi me ndihmën e Rusisë, Lukashenko i detyrohet Moskës dhe është shumë i varur prej saj.
Bjellorusia tashmë po e ndihmon shumë Rusinë në pushtimin e Ukrainës në një sërë mënyrash: nga trajnimi i rezervistëve rusë të mobilizuar së fundi, te ofrimi i kujdesit mjekësor për të plagosurit rusë dhe dërgimi i armëve dhe pajisjeve, deri te përdorimi i Rusisë i territorit bjellorus për të nisur sulmet tokësore dhe ajrore në Ukrainë.
Mediat ruse njoftojnë se Putini "do të shpallë një vendim të rëndësishëm"
Korrespondenti i Sky News thekson se ndoshta nuk do të mund të shihet shumë nga njoftimet zyrtare për vizitën e sotme të Putinit në Rusi. Por Putin u takua publikisht me udhëheqësit e ushtrisë dhe ministrisë së mbrojtjes të premten për të diskutuar planet për luftë në Ukrainë. Gjithashtu u njoftua se ai do të takohet përsëri me ta në fund të kësaj jave, kur, të paktën sipas televizionit shtetëror rus, ai duhet "të shpallë një vendim të rëndësishëm".
Prania e ministrit rus të Mbrojtjes Sergei Shoigu është e rëndësishme, sipas korrespondentit të Sky News nga Moska. Ajo sugjeron se Putini po merr një rol shumë aktiv në planifikimin e një ofensive të ardhshme në Ukrainë. /Nacionale/
