Ukraina thotë se këtë vit ka rimarrë mbi 600 kilometra katrorë territor të pushtuar

Forcat ukrainase kanë rimarrë nën kontroll më shumë se 600 kilometra katrorë territor deri më tani këtë vit, tha të hënën komandanti i ushtrisë, Oleksandr Syrskyi.

Vetëm në muajin maj, Ukraina rimori 100 kilometra katrorë territor më shumë sesa që humbi, tha Syrksyi në rrjetin “Telegram”, raporton agjencia e lajmeve “Reuters”.

Komandanti nuk saktësoi se në cilat janë ka ndodhur rikthimi i territorit, duke thënë vetëm që në zona të caktuara të vijës së frontit, e gjatë 1.200 kilometra, forcat ukrainase vazhdojnë që ta mbajnë iniciativën.

Edhe presidenti ukrainas, Volodymyr Zelensky, kishte thënë muajin e kaluar se vendi i tij kishte rimarrë rreth 600 kilometra katrorë më 2026.

Agjencia “Reuters” nuk ishte në gjendje që t’i vërtetonte pohimet. Përcaktimi i pavarur i vijave të kontrollit territorial në Ukrainë është i vështirë për shkak të luftimeve me dronë, të cilat kanë krijuar një “zonë të vdekjes” të gjerë përgjatë frontit. Megjithatë, grupet e pavarura që hartojnë harta të fushës së betejës gjithashtu kanë raportuar se avancimet e përgjithshme të Rusisë janë ngadalësuar ose janë kthyer mbrapsht në muajt e fundit, për herë të parë që nga kundërsulmi i dështuar ukrainas më 2023.

Syrskyi tha se forcat ruse akoma po mundohen që të avancojnë në lindje dhe jug të vendit, duke theksuar se numri i përleshjeve ditore në fushën e betejës është rritur në masë të konsiderueshme dhe duke e përshkruar situatën në vijën e frontit si “të vështirë dhe dinamike”.

Sipas tij, zona përreth qytetit lindor të Pokrovskit, të cilin Rusia është munduar ta kapë që nga mesi i vitit 2024, është në mesin e vendeve më intensive të luftimeve.

Harta e pavarur ukrainase për fushëbeteja, “DeepState”, për javë të tëra e ka shfaqur Pokrovskin si të mbajtur plotësisht nga rusët. Rusia pretendoi se e kishte kapur këtë qytet në dhjetorin e vitit të kaluar./Nacionale