Tre persona humbën jetën në sulmin në termocentralin në Kiev

Tre persona u vranë në një sulm me raketa ruse në një termocentral në Kiev, tha kryetari i bashkisë së Kievit. Tymi i dendur mund të shihet në veri të Kievit, ku ndodhet termocentrali, pasi u dëgjuan disa shpërthime të forta, thanë dëshmitarët për Reuters.

Furnizimi me energji elektrike në disa pjesë të qytetit u ndërpre për shkak të dëmtimit të infrastrukturës kritike, por shpejt u rikthye, njoftoi kompania energjetike DTEK. Kryetari i bashkisë së Kievit, Vitaly Klitschko tha se dy objektiva të infrastrukturës, të cilat ai nuk i identifikoi, kishin pësuar "dëm të konsiderueshëm".

"Në sulmin e sotëm në infrastrukturën kritike të Kievit, tre persona vdiqën. Këta janë punëtorët e njërës prej atyre infrastrukturave kritike", tha ai. Zyra e prokurorit të Kievit hapi një hetim për një "shkelje të mundshme të ligjeve dhe zakoneve të luftës".

Sulmi në termocentralin në Kharkiv dhe Dnieper

"Ukraina është nën zjarrin e pushtuesve. Ata vazhdojnë të bëjnë atë që bëjnë më së miri - terrorizojnë dhe vrasin civilët", shkroi presidenti ukrainas Volodymyr Zelenskiy në Telegram.

Ai tha se 30 për qind e termocentraleve të Ukrainës ishin shkatërruar në sulmet ajrore ruse që nga 10 tetori dhe tha se Moska do të mbajë përgjegjësi për veprimet e saj.

Zyrtarët lokalë thanë se u sulmuan edhe termocentralet në Kharkiv dhe termocentrali në Dnieper, i cili u dëmtua rëndë. Qyteti verior i Zhytomyr mbeti pa ujë dhe energji elektrike për shkak të sulmit ajror dhe një raketë goditi gjithashtu një ndërtesë banimi në Mikolajiv. Një burrë u vra në atë sulm, tha Zelensky.

Pesë persona u vranë në një sulm rus në një ndërtesë apartamentesh në Kiev të hënën, thanë zyrtarët ukrainas. /Nacionale/