Të paktën 15 të vrarë nga sulmi izraelit pranë një qendre ndihmash në Gazë

Të paktën 15 palestinezë janë vrarë nga granatimet dhe të shtënat e ushtrisë izraelite pranë një qendre shpërndarjeje ndihmash në Rafah, në jug të Gazës, sipas mjekëve dhe banorëve lokalë.

Gazetari lokal nga Rafahu, Mohammed Ghareeb, i tha BBC-së se mijëra palestinezë ishin mbledhur pranë një qendre shpërndarjeje ndihmash humanitare të financuar nga ShBA-të, kur tanket izraelite u afruan dhe hapën zjarr ndaj turmës.

Gazetarë dhe aktivistë lokalë publikuan pamje tronditëse të trupave dhe të plagosurve që po transportoheshin me karroca me gomar drejt një spitali të improvizuar të Kryqit të Kuq në zonën al-Mawasi të Rafahut, pasi ekipet e shpëtimit thuhej se nuk kishin mundur të hynin në vendngjarje.

BBC-ja ka kontaktuar Forcat e Mbrojtjes së Izraelit (IDF) për një reagim.

Z. Ghareeb tha se turma e palestinezëve ishte mbledhur pranë rrethrrotullimit Al-Alam rreth orës 04:30 me kohën lokale (02:30 BST), afër qendrës së ndihmave të drejtuar nga Fondacioni Humanitar i Gazës, pak para se të shfaqeshin tanket izraelite dhe të hapnin zjarr.

“Të vdekurit dhe të plagosurit qëndruan për një kohë të gjatë në tokë,” tha Ghareeb. “Ekipet e shpëtimit nuk mund të hynin në zonë, e cila është nën kontrollin izraelit. Kjo i detyroi banorët të përdornin karroca me gomar për të transportuar viktimat drejt spitalit fushor.”