Stoltenberg: NATO s’është pjesë e konfliktit, ka rol kyç në mbështetje të Ukrainës
Sekretari i Përgjithshëm i NATO-s, Jens Stoltenberg, ka njoftuar se aleanca do të mblidhet këtë javë në mbështetje të Ukrainës.
Duke folur në një konferencë shtypi, Stoltenberg tha se, “NATO nuk është pjesë e konfliktit, por ka një rol kyç në mbështetje të Ukrainës”.
Ai bëri të ditur se, të mërkurën, ministrat e Mbrojtjes të NATO-s do të ftojnë homologun e tyre ukrainas për të “diskutuar sistemet e avancuara të mbrojtjes ajrore dhe aftësitë e tjera në Ukrainë, dhe unë pres me padurim dërgesat e mëtejshme”.
“Ukraina ka momentumin dhe vazhdon të ketë fitime të rëndësishme, ndërkohë që Rusia po përdor gjithnjë e më shumë sulme të tmerrshme dhe pa dallim ndaj civilëve dhe infrastrukturës kritike. Presidenti Putin po dështon në Ukrainë”, tha më tej ai.
Duke iu referuar kërcënimeve të fshehta të presidentit rus Vladimir Putin për një sulm bërthamor, Stoltenberg tha se "Rusia e di se lufta bërthamore nuk mund të fitohet dhe nuk duhet të luftohet kurrë".
“Ne po monitorojmë nga afër forcat bërthamore të Rusisë; ne nuk kemi parë ndonjë ndryshim në qëndrimin e Rusisë, por ne mbetemi vigjilentë”, tha ai.
Sekretari i Përgjithshëm i bëri thirrje përsëri presidentit rus Vladimir Putin që të tërheqë trupat e tij nga Ukraina.
Ai gjithashtu iu drejtua dislokimeve të përbashkëta ushtarake të Bjellorusisë me Rusinë në mënyrë indirekte duke thënë se udhëheqësi bjellorus Alexander Lukashenko duhet të "ndalojë bashkëpunimin e Bjellorusisë në këtë konflikt të paligjshëm".
Stoltenberg tha gjithashtu se NATO ka rritur mbrojtjen e infrastrukturës kritike pas asaj që ai e quajti "sabotazh" të tubacioneve Nord Stream, duke dyfishuar praninë e saj në Detet Baltik dhe Veri në mbi 30 anije dhe duke rritur shkëmbimin e inteligjencës.
“Çdo sulm në infrastrukturën kritike të aleatëve do të përballet me një përgjigje të bashkuar dhe të vendosur,” tha ai.
