Shtëpia e Bardhë mohon se ShBA-ja e ka kërkuar zgjatjen e armëpushimit me Iranin
Sekretarja për shtyp e Shtëpisë së Bardhë, Karoline Leavitt, tha të mërkurën se raportimet se Shtetet e Bashkuara kanë kërkuar që të zgjatet armëpushimi me Iranin nuk janë të vërteta.
“Ne mbetemi shumë të angazhuar në këto bisedime” – tha ajo, duke shtuar se negociatat janë “produktive dhe duke vazhduar”, raporton televizioni BBC.
Sa u përket raportimeve se po planifikohen bisedime sy më sy, ajo tha se “ato diskutime po bëhen, por asgjë nuk është zyrtare derisa ju ta dëgjoni atë nga ne këtu në Shtëpinë e Bardhë”.
“Ndihemi shumë mirë për perspektivën e një marrëveshjeje” – tha më tej zonja Leavitt, duke shtuar se është “në interesat më të mira të Iranit” që t’i përmbushë kërkesat e presidentit amerikan, Donald Trump, të cilat, sipas saj, ai i ka bërë “shumë të qarta”.
Nëse bisedimet mbahen, ato “me shumë gjasë” do të jenë në vendin e njëjtë si herën e kaluar – në Islamabad të Pakistanit, tha Leavitt.
