Rusia e sulmon Ukrainën me mbi 100 dronë, të paktën dhjetë të vrarë

Rusia hodhi më shumë se 100 dronë në zona civile të Ukrainës gjatë natës së kaluar, thanë të hënën autoritetet. Së paku 10 civilë u vranë.

Përpos të vrarëve, 38 persona pësuan lëndime, përfshirë tre fëmijë, nga sulmet ruse gjatë 24 orëve të fundit, thanë zyrtar ukrainas, raporton agjencia e lajmeve “Associated Press”.

Rusia rishtazi i ka shpeshtuar sulmet ajrore ndaj zonave civile pas më shumë se tre vjetëve luftë. Gjatë javës së kaluar, Rusia hodhi 1.270 dronë, 39 raketa e gati një mijë bomba të fuqishme rrëshqitëse drejt Ukrainës, tha të hënën presidenti ukrainas, Volodymyr Zelensky.

Ushtria ruse, më e madhe se ajo e Ukrainës, gjithashtu po mundohet fort që të depërtojë në disa pika përgjatë vijës së frontit të gjatë rreth 1 mijë kilometra, ku forcat ukrainase janë mjaft të tendosura.

Zelensky tha të shtunën se vendi i tij kishte nënshkruar marrëveshje me aleatë evopianë dhe me një kompani amerikane të mbrojtjes për ta shtuar prodhimin e dronëve, duke u siguruar që Kievi të pranojë “qindra mijëra” më shumë të tillë këtë vit.

“Mbrojtja ajrore është gjëja kryesore për mbrojtjen e jetës” – shkroi Zelensky të hënën në rrjetin “Telegram”. Sipas tij, këtu përfshihen zhvillimi dhe prodhimi i dronëve pengues që mund t’i ndalin dronët “Shahed” të prodhimit iranian që po përdoren nga Rusia.

Përdorimi i gjerë i dronëve e ka ndihmuar Ukrainën edhe sa i përket mungesës së trupave në vijnë e frontit./Nacionale