Rrëzohet një helikopter ushtarak izraelit në Gaza, ka viktima

Dy ushtarë vdiqën dhe disa të tjerë u lënduan, kur një helikopter i Forcës Ajrore të Izraelit u rrëzua në jug të Rripit të Gazës të mërkurën herët. Ushtria e përshkroi rastin si aksident.

Sipas një hetimi fillestar të Forcës Ajrore të Izraelit, një helikopter i tipit “UH-60 Black Hawk” nga Skuadroni i 123-të fluturoi për në Rafah me një ekip mjekësor të Njësisë 669 të martën natën për të evakuuar një inxhinier luftarak që ishte plagosur seriozisht gjatë luftimeve në zonë, raporton gazeta “The Times of Israel”.

Gjatë fazës përfundimtare të aterrimit brenda një kampi ushtarak izraelit në Rafah rreth orës 12 e 30 minuta pas mesnatës, helikopteri e preku tokën në mënyrë të gabuar në vend të aterrimit korrekt.

Sipas hetimit, helikopteri nuk është goditur nga zjarri i armikut dhe se rrëzimi ndodhi disa çaste para aterrimit të planifikuar, që do të thotë se nuk ka rënë nga një lartësi e madhe.

Megjithatë, helikopteri u dëmtua rëndë dhe të gjithë brenda tij u lënduan. Në përgjithësi, dy ushtarë e humbën jetën dhe tetë të tjerë u dërguan në spitale. Katër prej tyre ishin në gjendje serioze. Në mesin e katër të lënduarve seriozisht ishte edhe inxhinieri ushtarak që ishte lënduar më parë.

Është ende e paqartë se çfarë e ka shkaktuar rrëzimin e helikopterit, edhe pse Forca Ajrore e Izraelit e përshkroi atë si aksident.

Komandanti i Forcës Ajrore, Gjeneral Major Tomer Bar, dha urdhër për nisjen e një hetimi për të përcaktuar se pse helikopteri e preku tokën në mënyrë jo të duhur.

Emrat e ushtarëve që e humbën jetën nuk u publikuan menjëherë, por ushtria izraelite tha se familjet e tyre janë njoftuar./Nacionale