Putini e ka një problem: 300,000 trupa "rezervë" nuk do t'ia fitojnë luftën në Ukrainë

Që nga java e kaluar, shteti rus është mobilizuar, ose të paktën pjesërisht, për të përmbushur kërkesat e luftës në Ukrainë.

I njoftuar gjatë një deklarate televizive nga presidenti rus Vladimir Putin, mobilizimi i pjesshëm i rezervave ruse pritet të sigurojë 300,000 trupa për njësitë ruse që luftojnë në vijën e frontit në Ukrainë.

Por ka disa probleme si me procesin e mobilizimit, por edhe me rezervistët e mobilizuar.

Gjendja e keqe e mobilizimit rus

Mobilizimi i një vendi për luftë nuk është një detyrë e lehtë. Nuk është e lehtë për burrat me familje dhe me punë të kthehen në ushtarë me uniformë sa hapë e mbyllë sytë.

Vendet që janë liderë në mobilizim, si Estonia dhe Finlanda, kuptojnë kompleksitetin e përfshirë në një proces kaq të rëndësishëm dhe i kryejnë procedurat shpesh për të zgjidhur çdo problem në drejtimin ushtarak, por edhe për të përgatitur popullatën për realitetet e një mobilizimi.

Por Rusia nuk është një vend i tillë. Dhe mobilizimi i 300,000 trupave po kërcënon të thyejë aftësitë logjistike të ushtrisë ruse.

Ka disa incidente në të cilat rezervistët e mobilizuar u është dashur të presin ditë të tëra për të arritur në bazën e tyre stërvitore ose u është dashur të presin me ditë të tëra atje pa bërë asgjë, përveçse të dehen dhe të zihen me njëri-tjetrin.

Gjatë gjithë kohës, ushtria ruse ka qenë e papërgatitur për të pranuar kaq shumë trupa në radhët e saj.

Ushtria ruse vazhdon të përballet me një goditje në Ukrainë dhe perspektiva e trupave të reja nga rezervat pjesërisht të mobilizuara nuk është shumë e ndritshme. Sipas raporteve dhe vlerësimeve të inteligjencës, rezervat e mobilizuara ruse janë në një gjendje shumë të dhimbshme, dhe ata po marrin trajnime dhe pajisje jashtëzakonisht të pamjaftueshme përpara se të dërgohen në vijën e frontit.

Në të vërtetë, pamjet nga kampet e stërvitjes tregojnë oficerët rusë që udhëzojnë rezervistët e mobilizuar që të sillnin ose t'u kërkonin familjeve të tyre t'u dërgonin në thelb gjithçka që do t'u duhej në një situatë luftarake, përveç armëve dhe municioneve të tyre. Lista përfshin artikuj të tillë si çanta gjumi, batanije, turniketa, pilula kundër diarresë, kuti të ndihmës së parë, çizme, thika dhe madje edhe tampona për të ndaluar gjakderdhjen nga plagët e plumbave.

Paaftësia e ushtrisë ruse për të siguruar rezervistët e mobilizuar ishte e pritshme. Në fund të fundit, Moska nuk ka qenë në gjendje të sigurojë trupat e saj në detyrë aktive, të cilët duhet të kërkojnë nevoja themelore si çizmet, ushqimin dhe madje edhe pajisjet e ndihmës së parë.

Vendimi i Putinit për të mobilizuar pjesërisht vendin e tij dhe për të thirrur 300,000 rezervistë supozohet t'i japë ushtrisë ruse fuqinë punëtore që i nevojitet aq shumë për të arritur disa nga objektivat e saj në Ukrainë. Megjithatë, kjo mund të mos jetë kështu në fund, dhe mobilizimi i pjesshëm ka të gjithë potencialin për të dështuar për Moskën. /Nacionale/