Papa në Kanada, kërkon falje historike për abuzimet në shkollat katolike
Mijëra indigjenë janë mbledhur të hënën në Alberta të Kanadasë, për të dëgjuar një kërkim falje të shumëpritur nga Papa Françesku për abuzimet ndër breza dhe shtypjen kulturore në shkollat rezidenciale katolike në të gjithë Kanadanë.
Papa Françesku ka arritur të dielën në Edmonton të Kanadasë, ku është pritur dhe përshëndetur nga përfaqësues të tre grupeve kryesore indigjene të Kanadasë - Kombet e Para, Metis dhe Inuit - së bashku me personalitete politike dhe kishtare.
Sipas Associated Press, në një gjest përulësie dhe nderimi që Papa e ka përdorur shumë herë kur është takuar me mbijetuarit e Holokaustit, edhe këtë radhë në ceremoninë e mirëseardhjes ai fillimisht ka puthur dorën e një të mbijetuari të një shkolle rezidenciale, Plakut Alma Desjarlais.
Kohë më parë, qeveria kanadeze ka pranuar se abuzimi fizik dhe seksual në shkollat e krishtera të financuara nga qeveria që funksiononin nga shekulli i 19-të deri në vitet 1970 ishte i shfrenuar. Në këto vite rreth 150,000 fëmijë indigjenë ishin marrë nga familjet e tyre në një përpjekje për t'i izoluar ata nga ndikimi i shtëpive, gjuhëve dhe kulturave të tyre amtare, si dhe për t'i asimiluar në shoqërinë e krishterë kanadeze.
Urdhrat fetare katolike funksiononin në 66 nga 139 shkollat rezidenciale të Kanadasë, ku mijëra fëmijë vdiqën nga sëmundjet, zjarri dhe shkaqe të tjera.
Ndërsa, ky udhëtimi gjashtë-ditor i Françeskut në Kanada, pason takimet që ai mbajti në pranverë në Vatikan me delegacione nga Kombet e Para, Metis dhe Inuit. Ato takime kulmuan me një kërkim falje historike të 1 prillit për abuzimet "e mjerueshme" të kryera nga disa misionarë katolikë në shkollat rezidenciale.
Papa, 85 vjeç, e ka quajtur udhëtimin një "pelegrinazh pendimi" për të ndihmuar Kishën Katolike të pajtohet me popujt vendas dhe t'i ndihmojë ata të shërohen nga ajo që Komisioni i të Vërtetës dhe Pajtimit të Kanadasë ka thënë se ishte "gjenocid kulturor".
Françeskut i është kërkuar të kërkonte falje për abuzimet në tokën kanadeze, një kërkesë që ai po e përmbush me udhëtimin.
Kujtojmë se, zbulimet e vitit të kaluar të varrezave të mundshme masive në ish shkollat katolike kanë tërhequr vëmendjen ndërkombëtare ndaj trashëgimisë së shkollave në Kanada dhe homologëve të tyre në Shtetet e Bashkuara.
Atëkohë, katolikët drejtonin shumicën e shkollave kanadeze, ndërsa besimet e ndryshme protestante drejtonin të tjerat në bashkëpunim me qeverinë.
E si pjesë e një zgjidhjeje gjyqësore që përfshin qeverinë, kishat dhe afërsisht 90,000 studentë të mbijetuar, Kanadaja pagoi dëmshpërblime që arritën në miliarda dollarë të cilat i’u transferuan komuniteteve indigjene.
Është bërë e ditur se në ngjarjen e mbajtur në Maskwacis, Alberta së bashku me zyrtarë të tjerë qeveritarë, do të marrë pjesë edhe kryeministri Justin Trudeau, i cili vitin e kaluar ka shprehur një ndjesë për "politikën tepër të dëmshme të qeverisë" në organizimin e sistemit shkollor rezidencial.
