Një varkë me emigrantë u përmbys në Greqi, shumë rezultojnë të zhdukur
Dhjetra emigrantë janë zhdukur nga një anije e mbytur pasi roja bregdetare greke shpëtoi sot 29 persona në detin Egje.
Emigrantët e shpëtuar thanë se varka e tyre ishte nisur nga Antalia, Turqi, me destinacion Italinë me 60 deri në 80 persona në bord, sipas një zëdhënësi të rojes bregdetare.
Anija u përmbys dhe u mbyt pranë ishullit Karpathos në Detin Egje në jug, tha zëdhënësi Nikos Kokalas për televizionin shtetëror. Operacioni i kërkim-shpëtimit filloi në orët e hershme të mëngjesit ndërsa po frynin erëra të forta, shtoi ai.
Emigrantët e shpëtuar janë afganë, iranianë dhe irakianë, tha një tjetër roje bregdetare.
“Po vërejmë një rritje të mprehtë të numrit të emigrantëve”
Greqia ishte në vijën e parë të krizës së emigrantëve në Evropë në 2015 dhe 2016, kur miliona refugjatë që ikën nga lufta dhe varfëria në Siri, Irak dhe Afganistan mbërritën në vend, kryesisht nëpërmjet Turqisë.
Që atëherë, numri i emigrantëve të ardhur ka rënë ndjeshëm. Por autoritetet greke thonë se kohët e fundit kanë parë një rritje të mprehtë të përpjekjeve për të hyrë në vend nëpërmjet ishullit dhe kufirit kontinental me Turqinë. /Nacionale/
