Një nxënëse në Iran dyshohet se është rrahur për vdekje nga policia sepse nuk donte të këndonte himnin kombëtar.

Forcat iraniane të sigurisë dyshohet se vranë një nxënëse tjetër, shkruan Guardian. Asra Panahi, 16-vjeçare dyshohet se u rrah gjatë një bastisjeje në shkollë, sepse ajo refuzoi të këndonte himnin pro regjimit. Kjo shkaktoi protesta të reja në të gjithë Iranin gjatë fundjavës.

Sipas Këshillit Koordinues të Shoqatave të Mësuesve Profesionistë të Iranit, Panahi vdiq pasi forcat e sigurisë sulmuan shkollën e mesme të vajzave Shahed në Ardabil më 13 tetor dhe kërkuan një grup vajzash të këndojnë një himn duke lavdëruar Udhëheqësin Suprem të Iranit, Ayatollah Ali Khamenei.

I rrahën nxënëset

Kur ato refuzuan, forcat e sigurisë rrahën nxënëset, duke çuar në dërgimin e shumë vajzave në spital dhe arrestimin e të tjerëve. Të premten, Panahi thuhet se vdiq në spital nga plagët e marra në shkollë.

Zyrtarët iranianë mohuan se forcat e tyre të sigurisë ishin përgjegjëse. Pasi vdekja e nxënëses shkaktoi zemërim mbarëkombëtar, një burrë i identifikuar si xhaxhai i saj u shfaq në televizionin shtetëror duke pretenduar se ajo vdiq nga një problem i lindur në zemër.

Javët e fundit, nxënëset iraniane kanë qenë një nga forcat më të zëshme të opozitës kundër regjimit. Ata hoqën hixhabet e tyre dhe shpërndanë video të tyre duke i prerë flokët dhe duke i treguar gishtin e mesit udhëheqësit suprem. Javët e fundit, oficerët e policisë kanë bastisur shkollat, duke hyrë me forcë në klasa, duke hedhur gaz lotsjellës dhe duke ndaluar studentët.

Sindikata e mësuesve në Iran dënoi bastisjet brutale dhe kërkoi dorëheqjen e ministrit të arsimit Yousef Nouri. /Nacionale/