Musk-u thotë se ka dhuruar aksione të Tesla-s me vlerë të gati 2 miliardë dollarëve për bamirësi
Shefi ekzekutiv i kompanisë “Tesla”, Elon Musk, ka thënë se ka dhuruar aksione me vlerë të rreth 1,95 miliard dollarëve për bamirësi vitin e kaluar.
Ky donacion përmendet në një dosje të rregullatorëve amerikanë. Megjithatë, aty nuk përmendet emri i marrësit ose emrat e marrësve të donacionit, raporton televizioni BBC.
Të mërkurën, miliarderi amerikan tha se fundi i këtij viti do të jetë “kohë e mirë” për të gjetur një person që do ta zëvendësonte atë në pozitën e shefit ekzekutiv të rrjetit “Twitter”.
Në dokumentin e dorëzuar në Komisionin e ShBA-së për Sigurime e Shkëmbime tregohet se donacioni është bërë mes gushtit dhe dhjetorit të vitit të kaluar.
Kjo nuk është hera e parë që Musk-u ka dhuruar aksione të prodhuesit të veturave elektrike për bamirësi. Ai dhuroi aksione me vlerën e rreth 5,74 miliardë dollarëve më 2021, sipas dokumenteve të rregullatorëve.
Vitin e kaluar, ai tha se planifikonte që t’ua dhuronte 20 milionë dollarë shkollave në distriktin Cameron dhe 10 milionë dollarë qytetit Brownsville në Teksas për “revitalizimin e qendrës së qytetit”.
Musk-u ka dhënë shenja se planifikon që të gjejë një zëvendësues për postin e shefit ekzekutiv të “Twitter”-it deri në fundin e vitit 2023.
“Mendoj se kam nevojë që ta stabilizoj organizatën dhe vetëm të sigurohem që të jetë në një vend të shëndoshë financiarisht dhe që plani i produktit të paraqitet qartazi”- tha ai përmes video-lidhjes në Samitin Botëror të Qeverive në Dubai.
