Mjekët raportojnë për gjashtë të vrarë nga zjarri izraelit në Gaza, përfshirë dy fëmijë
Zjarri izraelit la të vrarë të paktën gjashtë palestinezë, përfshirë dy fëmijë, në incidente të ndryshme në Rrin e Gazës të martën, thanë zyrtarët shëndetësorë lokalë.
Katër njerëz, përfshirë një djalë 3-vjeçar, Yahya Al-Malahi, u vranë nga një sulm që kishte në shënjestër një automjet të policisë në qytetin Gaza, tha Ministria e Brendshme e drejtuar nga Hamasi, e cila tha se në mesin e të vrarëve ishte një oficer policor, ndërsa nëntë kalimtarë rasti pësuan lëndime, raporton agjencia e lajmeve “Reuters”.
Në pjesën veriore të enklavës, afër qytetit Jabalia, zjarri izraelit e la të vrarë fëmijën 14-vjeçar, Adam Ahmed Halaa, thanë autoritetet shëndetësore dhe familja e tij.
Ushtria izraelite nuk ofroi menjëherë ndonjë koment për ndonjërin nga këto incidente.
Në spitalin më të madh të Gazës, “Al-Shifa”, të afërmit shkuan me nxitim për t’ua dhënë lamtumirën të vrarëve.
Duke e mbajtur të birin e tij të vogël në krahë, Mukhlis Al-Malahi, tha se ata po largoheshin nga dasma e një të afërmi, kur aeroplani izraelit e sulmoi automjetin e policisë.
“Iu afruam udhëkryqit të Timrazit me Nafaqin [emra rrugësh], pastaj papritmas diçka po na godiste. Ata goditën një automjet të policisë, kur ne po ecnim” – tha babai që e kishte këmishën të njollosur me gjakun e të birit.
“Cili është faji i tij? Cili është krimi i tij? Ai do të duhej të kishte veshur një kostum dasme në martesën e kushëririt të tij sot, por, në vend të tij, ai veshi një qefin të njollosur me gjak” – tha duke qarë kushëriri i tij, Hader Al-Malahi.
Në pjesën veriore të Gazës, ushtria izraelite tha se vrau një burrë që iu afrua vijës së armëpushimit me Hamasin, duke e përshkruar si militant të armatosur.
Autoritetet shëndetësore konfirmuan se një burrë ishte vrarë në atë zonë, pa dhënë hollësi./Nacionale
