Ministrat ekstremistë izraelitë dalin kundër paktit për armëpushim në Gaza
Raportimet se Hamasi është pajtuar me një propozim të ri për armëpushim dhe lirim të pengjeve nga Gaza nxitën reagime të shpejta në Izrael. Disa e nxitën Qeverinë që të arrijë marrëveshje, por kundërshtarët e paktit – përfshirë disa anëtarë të koalicionit qeveritar – paralajmëruan kundër një veprimi të tillë.
Hamasi u ka thënë ndërmjetësve se pranon një propozim që i ishte dorëzuar grupit një ditë më parë. Sipas burimeve, propozimi përfshin një armëpushim 60-ditor dhe lirimin e dhjetë pengjeve të gjalla, shkruan gazeta “The Times of Israel”.
“Ju nuk keni mandat për të zgjedhur një marrëveshje të pjesshme” – tha në një deklaratë ministri i Sigurisë Kombëtare i Izraelit, Itamar Ben Gvir, duke iu drejtuar kryeministrit Benjamin Netanyahu. “Gjaku i ushtarëve tanë nuk është i pavlerë. Duhet të shkojmë deri në fund. Shkatërrojeni Hamasin” – shtoi ai.
Ministri i Financave i Izraelit, Bezalel Smotrich, argumentoi se Hamasi i kishte zbutur kërkesat e veta vetëm për shkak të frikës se ofensiva e planifikuar izraelite në Qytetin Gaza do ta shkatërronte grupin.
“Hamasi është nën presion të madh për shkak të pushtimit [të planifikuar] të Gazës, sepse ai merr vesh që kjo do ta eliminojë dhe do t’i japë fund tregimit. Prandaj, po mundohet që ndalë këtë dhe ta kthejë marrëveshjen e pjesshme. Pikërisht për këtë, ne nuk mund të dorëzohemi dhe t’i japim armikut një linjë jete” – shkroi ai në rrjetin X.
“Vazhdoni deri në fund, fitoni dhe kthejini të gjitha pengjet brenda një faze” – shtoi ai, duke publikuar një shkrim të presidentit amerikan, Donald Trump, në rrjete sociale, ku kreu i Shtëpisë së Bardhë thotë se e vetmja mënyrë që Hamasi t’i kthejë pengjet është nëse “konfrontohet dhe shkatërrohet”.
