Mbështetësit e një udhëheqësi fetar shiit sulmuan pallatin qeveritar në Bagdad

Mbështetësit e liderit fetar shiit, politikanit dhe udhëheqësit paraushtarak irakian Muqtada al-Sadr sulmuan pallatin qeveritar në Bagdad, i cili gjithashtu strehon zyrën e kryeministrit, sipas dëshmitarëve.

Menjëherë pasi Al-Sadr njoftoi tërheqjen e tij nga politika, mbështetësit e tij marshuan drejt Zonës së Gjelbër të Bagdadit, e cila strehon ndërtesat qeveritare dhe ndërtesat e ambasadave.

Dëshmitarët okularë pohojnë se protestuesit, mbështetës të Al-Sadr, fillimisht hoqën barrierat e betonit për të lejuar sa më shumë njerëz të hynin në Zonën e Gjelbër pavarësisht pranisë së madhe të forcave të sigurisë. Disa prej tyre mbanin foto të Al-Sadr, ndërsa të tjerët brohoritnin "Populli dëshiron të përmbysë regjimin".

Është shpallur shtetrrethimi

Ushtria irakiane shpalli një shtetrrethim në të gjithë zonën e Bagdadit, i cili hyri në fuqi në orën 15:30 me orën lokale, por kjo nuk i pengoi mbështetësit e Al-Sadrit nga planet e tyre.

Muqtada al-Sadr njoftoi sot se po tërhiqet nga politika dhe do të mbyllë institucionet e tij në përgjigje të një ngërçi të vështirë politik. "Unë shpall tërheqjen time përfundimtare", tha Al-Sadr në Twitter.

Ai kritikoi liderët politikë shiitë që nuk i vunë veshin thirrjeve të tij për reforma. Ai nuk ka dhënë detaje se do të mbyllë zyrat e tij, por ka thënë se disa nga institucionet e tij kulturore dhe fetare do të qëndrojnë të hapura.

Iraku nuk ka pasur qeveri që nga qershori

Al-Sadr tërhoqi deputetët e tij nga parlamenti në qershor pasi dështoi të formonte një qeveri sipas zgjedhjes së tij. Bllokimi politik mes tij dhe rivalëve shiitë afër Iranit ka çuar në periudhën më të gjatë pa një qeveri në Irak.

Që nga fundi i korrikut, mbështetësit e al-Sadr kanë pushtuar parlamentin dhe kanë protestuar pranë ndërtesave qeveritare, duke vonuar kështu procesin e zgjedhjes së presidentit dhe kryeministrit të ri.

Dyshohet se njoftimi i Al-Sadr do të inkurajojë mbështetësit e tij për të përshkallëzuar protestat, të cilat mund të fillojnë një fazë të re të destabilitetit në Irak. /Nacionale/