Ku është presidenti kinez? Dalin thashetheme për grusht shteti në Kinë
Kina është përshkuar nga thashethemet për një komplot të stilit të Game of Thrones, ndërsa intrigat kanë tronditur Partinë Komuniste.
Një mungesë dhjetë ditore e presidentit kinez Xi Jinping nga sytë e publikut, ka nxitur thashetheme dhe spekulime të shumta përpara një takimi kyç të Partisë Komuniste që do të mbahet muajin e ardhshëm.
Thashethemet thonë se në Kinë ka ndodhur një grusht shteti dhe se presidenti kinez Xi Jinping është arrestuar.
Megjithatë, këto spekulime nuk janë komentuar zyrtarisht nga shteti kinez.
Udhëheqësi 69-vjeçar - i cili ka udhëhequr kombin gjigant për dhjetë vjet - shpesh ka qenë qendra e intrigave rreth shëndetit dhe të ardhmes së tij.
Ndërsa, këtë herë mungesa e Xi-së nxiti spekulime pas burgosjes së katër zyrtarëve të profilit të lartë për korrupsion.
Kurorëzimi i pritshëm i Xi-së në Kongresin e Partisë Komuniste që do të mbahet më 16 tetor - ndoshta duke përdorur titullin e ringjallur të Maos "Udhëheqësi i Popullit”, tani është dëmtuar nga thashethemet e përhapura në vend si një zjarr i egër.
Çfarë i shkaktoi thashethemet?
Xi nuk ishte i pranishëm në Asamblenë e Përgjithshme të Kombeve të Bashkuara në Nju Jork më 21 shtator - në vend të kësaj ai dërgoi një mesazh të regjistruar paraprakisht. Ndërsa mësohet se ai ishte i ftuar në funeralin e Mbretëreshës Elizabeth, por në vend të tij shkoi një “përfaqësues special”.
Sipas The Sun, në qendër të spekulimeve është gjenerali Li Qiaoming, oficeri më i lartë në Ushtrinë Çlirimtare Popullore. Është sugjeruar se ai mund të jetë ai që do të zëvendësojë Xi-në, nëse do të kishte një lëvizje për ta rrëzuar atë.
Raportet e pa verifikuara dhe të pakonfirmuara kanë shkuar aq larg sa sugjerojnë për grusht shteti të plotë në Pekin, megjithatë Xi është përfshirë në listën e delegatëve që do të marrin pjesë në kongresin e 16 tetorit, duke vënë në dukje se të gjitha këto në fakt janë vetëm thashetheme.
Duke qenë se klasa sunduese e fshehtë dhe izoluese e Kinës e bën jashtëzakonisht të vështirë verifikimin e çdo informacioni në lidhje me makinacionet e brendshme, ekspertët thonë se kjo gjë çon në “vatër” intrigash.
Aktualisht, Xi është duke u përballur me probleme të brendshme dhe ndërkombëtare për shkak të Covidit.
