Koreja e Jugut dhe ShBA-ja i përgjigjen Koresë së Veriut me një breshëri raketash në det
Pasi Pheniani hodhi një raketë mbi Japoni, në një nga përgjigjet me të mprehta të aleatëve që nga viti 2017, Korea e Jugut dhe ushtria amerikane nisën stërvitje të rralla raketore, duke vendosur edhe një superbartës amerikan në lindje të vendit.
Të martën, Koreja e Veriut testoi një raketë balistike me rreze të mesme veprimi, duke e dërguar më larg se kurrë më parë - mbi Japoni, për herë të parë në pesë vjet dhe duke nxitur një paralajmërim për banorët që të mbroheshin.
Ky veprim i Koresë së Jugut u cilësua nga Shtëpia e Bardhë si "i rrezikshëm dhe i pamatur", duke bërë që ushtria amerikane dhe aleatët e saj ta shtojnë shfaqjen e forcës.
Si përgjigje, trupat e Koresë së Jugut dhe ato amerikane hodhën një breshëri raketash në det.
"USS Ronald Reagan", një aeroplanmbajtëse amerikane që e bëri ndalimin e saj të parë në Korenë e Jugut muajin e kaluar për herë të parë në vite, do të kthehet gjithashtu në detin midis Koresë dhe Japonisë me grupin e saj sulmues të anijeve të tjera luftarake. Ushtria e Koresë së Jugut e quajti atë një lëvizje "shumë të pazakontë", të krijuar për ta treguar vendosmërinë e aleatëve për t'iu përgjigjur çdo kërcënimi nga Koreja e Veriut.
Ushtria e Koresë së Jugut po ashtu konfirmoi veçmas se një nga raketat e saj, "Hyunmoo-2C", dështoi pak pas lëshimit dhe u rrëzua gjatë stërvitjes, por se askush nuk u lëndua.
Pamjet nga dështimi i raketës u shpërndanë në rrjete sociale nga një banor, ndërsa bëhet e ditur se mosfunksionimi ishte shkaktuar nga djegia e karburantit të raketës.
Ky dështim kërcënoi t'i errësojë përpjekjet e Seulit për të demonstruar aftësi ushtarake përballë aftësive në rritje të Koresë së Veriut.
