Korea e Veriut lëshon raketa balistike pas largimit të Harris nga Korea e Jugut
Disa orë pasi zëvendëspresidentja e ShBA-së, Kamala Harris u largua nga një vizitë e realizuar në Koren e jugut, në një shfaqje sfide Korea e Veriut gjuajti në det dy raketa balistike me rreze të shkurtër veprimi.
Gjatë vizitës së saj Harris udhëtoi në Zonën e Çmilitarizuar që ndan dy Koretë dhe theksoi angazhimin "e hekurt" të ShBA-së për sigurinë e aleatëve të saj aziatikë.
Lëshimi i raketave, ishte raundi i tretë nga Korea e Veriut këtë javë, duke zgjatur një ritëm rekord në testimin e armëve, ndërsa përshpejton zgjerimin e arsenalit të saj dhe bën presion ndaj Uashington që ta pranojë atë si një fuqi bërthamore.
Shefi i Shtabit të Përbashkët të Koresë së Jugut tha se raketat u hodhën nëntë minuta larg nga një zonë në veri të kryeqytetit, Phenian, dhe fluturuan drejt ujërave midis Gadishullit Korean dhe Japonisë.
Ushtria japoneze tha se zbuloi gjithashtu lëshime ditën e mërkurë, ndërsa Harris ndodhej në Japoni.
Harris më herët e mbylli udhëtimin e saj katër-ditor në Azi me një takim me presidentin e Koresë së Jugut, Yoon Suk Yeol dhe një ndalesë në Zonën e Çmilitarizuar, ku trajtoi kërcënimin gjithnjë e më armiqësor që vjen nga Veriu.
Ka shqetësime se Koreja e Veriut së shpejti mund të kryejë një provë bërthamore, e cila do ta çonte vendin më pranë njohjes si një fuqi bërthamore e plotë.
Vizita në Zonën e Çmilitarizuar është bërë diçka si një ritual për liderët amerikanë që shpresojnë të tregojnë vendosmërinë e tyre për të qëndruar të patundur kundër agresionit.
Në zonë, Harris shkoi në majë të një kreshte, pranë kullave të rojeve dhe kamerave të sigurisë. Ajo shikoi me dylbi të mëdha ndërsa një oficer koreano-jugor vuri në dukje instalimet ushtarake në anën jugore. Pastaj një oficer amerikan vuri në dukje disa nga mbrojtjet përgjatë vijës së demarkacionit ushtarak, duke përfshirë gardhe me tela me gjemba dhe mina argjile. Ai tha se ushtarët amerikanë ecin rregullisht në patrulla përgjatë një shtegu.
Harris më pas vizitoi një nga një rresht ndërtesash blu që shtrihen në vijën e demarkacionit, ku një oficer amerikan shpjegoi se si ndërtesat përdoren ende për të zhvilluar negociata me Korenë e Veriut.
