Kina komentoi akuzat për dërgimin e armëve në Rusi

Zëvendës ambasadori kinez në Kombet e Bashkuara Dai Bing tha në Asamblenë e Përgjithshme të organizatës se pas një viti lufte në Ukrainë, "faktet brutale ofrojnë prova të mjaftueshme se dërgimi i armëve nuk do të sjellë paqe".

"Shtimi i benzinës në zjarr vetëm do të përkeqësojë tensionet. Zgjatja dhe zgjerimi i konfliktit vetëm do t'i detyrojë njerëzit e zakonshëm të paguajnë një çmim edhe më të lartë," tha ai. "Ne jemi të gatshëm të vazhdojmë të luajmë një rol konstruktiv në zgjidhjen e krizës ukrainase dhe të sjellim paqen sa më shpejt të jetë e mundur," tha ai.

Fuqitë perëndimore e kanë furnizuar Ukrainën me miliarda dollarë armë që nga pushtimi i Rusisë. Shtetet e Bashkuara dhe NATO e kanë akuzuar Kinën se po konsideron furnizimin e Rusisë me armë dhe e kanë paralajmëruar atë që të mos e bëjë këtë.

"Armët bërthamore nuk duhet të përdoren"

Dai foli në Kombet e Bashkuara një ditë pasi kryediplomati i Kinës vizitoi Moskën dhe u zotua për një partneritet më të thellë me Rusinë. Kina dhe Rusia njoftuan një partneritet "pa ndalim" pak para fillimit të pushtimit. Asambleja e Përgjithshme e OKB-së do të votojë më vonë sot për një projekt-rezolutë që bën thirrje për një "paqe gjithëpërfshirëse, të drejtë dhe të qëndrueshme" dhe kërkon që Rusia të tërheqë trupat e saj.

Që nga fillimi i pushtimit rus më 24 shkurt të vitit të kaluar, presidenti rus Vladimir Putin ka lënë të kuptohet vazhdimisht se Rusia mund të përdorë armë bërthamore. “Armët bërthamore nuk duhet të përdoren, lufta bërthamore nuk mund të bëhet”, tha Dai.

"Të gjitha palët duhet të bashkohen kundër përdorimit ose kërcënimit të përdorimit të armëve bërthamore, të parandalojnë përhapjen e armëve bërthamore dhe të shmangin një krizë bërthamore", përfundoi ai. /Nacionale/