Izraeli thotë se ka përfunduar sulmet “e sakta” në Iran

Siç njofton BBC-ja, Izraeli ka thënë se ka përfunduar “sulme të sakta dhe të synuara” në Iran gjatë natës, duke sqaruar se synim ishin bazat ushtarake në perëndim dhe jugperëndim të Teheranit.

Media shtetërore iraniane, vazhdon BBC-ja, thotë se sulmet nuk kanë shkaktuar ndonjë dëm të vërtetë, por siç shpjegon gazetari Persian i BBC-së, Bahman Kalbasi, kjo është historikisht një përgjigje tipike nga Irani pas sulmeve të tilla.

Presidenti i SHBA-së, Joe Biden dhe zëvendës-presidentja, Kamala Harris janë informuar të dy për sulmet, Pentagoni thotë se SHBA ishte vënë në dijeni për planet e Izraelit, por nuk kishte asnjë përfshirje.

Kryeministri i Mbretërisë së Bashkuar Keir Starmer tha se Irani nuk duhet t'i përgjigjet sulmeve izraelite, duke folur në një konferencë për shtyp në Samoa.

Shpërthime u raportuan gjithashtu në Siri, sipas televizionit shtetëror.