Izraeli i dëbon katër aktivistët e parë të flotës që u mundua të arrinte në Gaza

Katër shtetas italianë janë dëbuar nga Izraeli, pasi ishin ndaluar nga autoritetet izraelite, kur po lundronin drejt Gazës si pjesë e një flote që synonte të dërgonte ndihma në enklavë, njoftoi Ministria e Jashtme e Izraelit.

Më shumë se 470 persona që ishin pjesë e flotës janë ndaluar, sipas policisë izraelite. Ministria e Jashtme tha se autoritetet ishin në proces të dëbimit të të tjerëve, raporton televizioni BBC.

Dëbimi i katër italianëve u bë kur anija e fundit e flotës “Global Sumud Flotilla” u pengua nga autoritetet izraelite të premten në mëngjes.

Anijet e para u ndalën rreth 130 kilometra larg bregdetit të Gazës në ujëra ndërkombëtare, ndërsa të tjerat më afër. Izraeli e vëzhgon atë zonë me forca të sigurisë, edhe pse nuk ka juridiksion mbi atë pjesë.

Bllokimi i anijeve me ndihma të nisura drejt Gazës ka nxitur protesta në pjesë të ndryshme të botës, përfshirë një grevë të përgjithshme në Itali.

Izraeli tha se forcat detare u kishin thënë anijeve që ta ndryshonin drejtimin, pasi “po i afroheshin një zone të luftimeve aktive dhe po shkelnin një bllokadë detare të ligjshme”, ndërsa drejtuesit e flotës e cilësuan “të paligjshëm” pengimin e anijeve.

Në një deklaratë, Ministria e Jashtme e Izraelit tha: “Tashmë katër shtetas italianë janë dëbuar. Pjesa tjetër janë në proces të dëbimit. Izraeli është i interesuar që ta përfundojë këtë procedurë sa më shpejt që është e mundshme.”

Më tej, kjo ministri tha se të gjithë personat e ndaluar janë të sigurt dhe me shëndet të mirë. Organizatorët e flotës kanë pretenduar se shumë prej aktivistëve janë sulmuar me topa uji gjatë pengimit të anijeve.

Në deklaratën e Ministrisë së Jashtme të Izraelit u përmend edhe prania e aktivistes suedeze me famë botërore, Greta Thunberg, në njërën prej anijeve, por nuk u dhanë hollësi të mëtejme rreth statusit të saj./Nacionale