Infrastruktura e Iranit nën sulm në një valë e re goditjesh
Izraeli ka nisur një valë të re sulmesh ndaj infrastrukturës në mbarë Iranin, tha ushtria e tij këtë të dielë.
Zhvillimet kryesore:
Objektet e depozitimit të naftës në shënjestër: Izraeli ka filluar të godasë objektet e depozitimit të naftës në Iran si pjesë e fazës së ardhshme të luftës, tha një burim izraelit. CNN raportoi se reshje uji të nxira ranë pasi u goditën depot e karburantit. Forcat Mbrojtëse të Izraelit thanë gjithashtu se goditën një numër të pacaktuar avionësh luftarakë F-14 të Iranit.
Shtetet e Gjirit zmbrapsin sulmet: Vende në mbarë Gjirin Persik raportuan një valë të re sulmesh me dronë dhe raketa. Në Kuvajt, u godit një ndërtesë qeveritare, si edhe depot e karburantit në aeroportin e tij ndërkombëtar. Emiratet e Bashkuara Arabe thanë se mbrojtja ajrore “aktualisht po i përgjigjet një kërcënimi me raketa”.
Aeroporti kryesor i Izraelit rifillon fluturimet: Rreth 2,000 udhëtarë pritet të nisen me 40 fluturime të planifikuara nga Ben Gurion, në fluturimet e para dalëse nga aeroporti që nga fillimi i luftës.
Trump i hedh poshtë kërcënimet: Presidenti i ShBA-së, Donald Trump, i shpërfilli kërcënimet nga zyrtari më i lartë i sigurisë së Iranit, duke thënë: “Nuk më intereson fare.” Ali Larijani i Iranit ishte zotuar se do të hakmerrej ndaj presidentit, duke thënë se Irani “nuk do ta lërë Trumpin të ikë” dhe se ai “duhet ta paguajë çmimin”.
Liderët e huaj reagojnë: Emiri i Katarit, Sheikh Tamim bin Hamad Al-Thani, paralajmëroi në një bisedë me Trumpin se përshkallëzimi i vazhdueshëm i luftës mund të ketë “pasoja të rrezikshme” për botën. Ministri i Jashtëm i Kinës, Wang Yi, përsëriti thirrjen e Pekinit për një armëpushim të menjëhershëm dhe paralajmëroi për “përhapjen e flakëve të luftës”.
