G7 pranon të krijojë një rrjet për të koordinuar hetimet për krimet e luftës në Ukrainë
G7-ta ra dakord të martën të krijojë një rrjet për të koordinuar hetimet për krimet e luftës, si pjesë e një shtytjeje për të ndjekur penalisht mizoritë e dyshuara në Ukrainë, shkruan The Guardian.
“Shqyrtimi gjyqësor i mizorive të kryera në Ukrainë do të zgjasë vite, ndoshta edhe dekada. Por ne do të jemi të përgatitur mirë dhe do të këmbëngulim për aq kohë sa të duhet”, tha në një deklaratë ministri gjerman i drejtësisë Marco Buschmann, raporton Reuters.
Ai erdhi pas një takimi të ministrave të drejtësisë të G7 në Berlin, ku morën pjesë edhe prokurorët specialë të gjykatës penale ndërkombëtare, prokurori federal i Gjermanisë dhe ministri ukrainas i drejtësisë Denys Maliuska.
Në një deklaratë të përbashkët, ministrat thanë se vendet e G7 do të sigurojnë që të ketë një pikë kontakti qendrore kombëtare në çdo shtet për ndjekjen penale të krimeve ndërkombëtare.
Buschmann u tha gazetarëve se kjo do të siguronte që informacioni mbi provat dhe kërkesat ligjore të mund të ndahej midis shteteve dhe organizatave ndërkombëtare.
Ai shtoi se deklaratat e viktimave të sulmit seksual duhet të regjistrohen në atë mënyrë që të jetë e pranueshme në gjykatë, në mënyrë që viktimat të duhet të japin deklaratën e tyre vetëm një herë.
Kujtojmë që Kombet e Bashkuara kanë deklaruar më herë se hetuesit e saj kanë arritur në përfundimin se Rusia ka kryer krime lufte në Ukrainë, duke përfshirë bombardimet e zonave civile, ekzekutime të shumta, tortura dhe dhunë të tmerrshme seksuale.
OKB-ja e ka bërë një prioritet hetimin e shkeljeve të të drejtave të njeriut në luftë dhe në maj organi më i lartë i saj për të drejtat e njeriut mandatoi një ekip ekspertësh për të filluar punën në vend.
Që atëherë, hetuesit e OKB-së, kanë rrezikuar jetën e tyre për të mbledhur prova të krimeve të kryera kundër civilëve, duke përfshirë zonat ende të kërcënuara nga forcat armike ose të vendosura me mina.
