Franca miraton projektligjin që ndalon rrjetet sociale për fëmijët nën 15 vjeç

Ligjvënësit francezë kanë miratuar një projektligj që ndalon përdorimin e rrjeteve sociale për fëmijët nën moshën 15 vjeç, një nismë e mbështetur nga presidenti Emmanuel Macron si mënyrë për të mbrojtur fëmijët nga koha e tepruar para ekraneve, shkruan The Guardian.

Dhoma e ulët e Parlamentit francez e miratoi tekstin me 130 vota pro dhe 21 kundër, pas një seance të gjatë nate nga e hëna në të martë.

Tani projektligji do t’i kalojë Senatit, dhomës së lartë të Francës, përpara se të bëhet ligj.

Macron e përshëndeti votimin si një “hap madhor” për mbrojtjen e fëmijëve dhe adoleshentëve francezë, në një postim në platformën X.

Legjislacioni, i cili parashikon gjithashtu ndalimin e telefonave mobilë në shkollat e mesme, do ta bënte Francën vendin e dytë që ndërmerr një hap të tillë, pas Australisë që ndaloi rrjetet sociale për nën 16-vjeçarët në dhjetor.

Me rritjen e përdorimit të rrjeteve sociale, janë shtuar edhe shqetësimet se koha e tepërt para ekranit po dëmton zhvillimin e fëmijëve dhe po kontribuon në problemet e shëndetit mendor.

“Emocionet e fëmijëve dhe adoleshentëve tanë nuk janë për t’u shitur apo manipuluar, qoftë nga platformat amerikane apo nga algoritmet kineze,” tha Macron në një video të transmetuar të shtunën.