Forcat speciale të NATO-s kryejnë stërvitje në Detin e Zi, pak kilometra larg Ukrainës
Një ushtar i marinës amerikane kërcen nga një helikopter rumun dhe rrëshqet në një litar. Ai është një nga disa njësi të forcave speciale amerikane që po marrin pjesë në një stërvitje ushtarake në Detin e Zi, vetëm 100 milje (160 kilometra) nga Ukraina, ku Rusia vazhdon të zhvillojë luftën e saj.
Sipas CNN stërvitjet po kryhen me një skenarë ku forcat e NATO-s kanë mision të ndalojnë një anije të pushtuar nga kryengritësit që kanë ndërprerë tregtinë në rajon.
Skenari është i rremë, por për Rumaninë, shqetësimet në rrugët e saj tregtare në Detin e Zi janë shumë reale - veçanërisht ndërsa Rusia vazhdon të projektojë fuqinë në rajon dhe ndërsa lufta e saj kundër Ukrainës, tani në muajin e tretë, po vazhdon.
Lufta ka arritur tashmë në skajin e zonës ekskluzive ekonomike të Rumanisë, në ishullin e gjarpërinjve, i njohur gjithashtu si ishulli Zmiinyi. Masa tokësore e vogël por strategjike, më pak se 30 milje nga bregu i Rumanisë, ka qenë vend i betejës dhe bombardimeve të ashpra.
NATO thotë se është përpjekur të mbështesë Ukrainën, e cila nuk është anëtare e aleancës, ndërkohë që po përpiqet të parandalojë përhapjen e konfliktit në vendet e tjera në rajon, tha një zyrtar i forcave speciale të aleancës për CNN. Ai shtoi se mbi të gjitha, objektivi kryesor i NATO-s vazhdon të jetë mbrojtja e vendeve anëtare.
Sipas zyrtarit, stërvitjet janë pjesë e Gjurmës së Trojës, e cila përfshin 30 vende dhe më shumë se 3,300 forca speciale dhe konvencionale. Ndërsa Ukraina nuk po merr pjesë këtë vit, shumë nga stërvitjet po zhvillohen në zona rreth vendit, afër territorit rus.
Por stërvitjet - dhe vendndodhja e tyre - nuk janë të reja: Ukraina mori pjesë në vitin 2021 dhe ishte planifikuar të përfshihej këtë vit përpara se të fillonte pushtimi rus në shkurt.
Këtë vit, mungon gjithashtu edhe Rusia, e cila, edhe pse nuk është ftuar zyrtarisht për të mbikëqyrur stërvitjen, zakonisht është në përcjellje të anijeve dhe njësive të NATO-s që veprojnë në zonë.
Stërvitja u zhvillua të hënën ndërsa trupat ruse parakaluan nëpër Sheshin e Kuq të Moskës, duke festuar Ditën e Fitores.
Megjithatë, pavarësisht luftës dhe tensioneve të rritura me Moskën, zyrtari thotë se rreziku i përshkallëzimit të shkaktuar nga stërvitjet ia vlen të merret.
