Dy të arrestuar për një plan të dyshuar për sulm islamik në koncertet e Taylor Swift në Vjenë
Autoritetet austriake kanë arrestuar një 19-vjeçar për planifikimin e dyshuar të një sulmi islamik në rajonin e Vjenës, në lidhje me koncertet e yllit amerikan Taylor Swift këtë javë.
Burri, i cili ishte zotuar për besnikërinë e tij ndaj grupit të Shtetit Islamik (IS) "javët e fundit", u arrestua në Austri të mërkurën, tha në një konferencë për shtyp shefi i lartë i sigurimit të Austrisë, Franz Ruf, raporton The Guardian.
I dyshuari kryesor, një austriak 19-vjeçar, dyshohet se ka dhënë betim për besnikëri ndaj grupit të Shtetit Islamik "javët e fundit".
Personi, një shtetas austriak, besohet se është radikalizuar në internet. Ruf tha se substancat kimike ishin sekuestruar në shtëpinë e të dyshuarit dhe ishin duke u vlerësuar.
Një person i dytë që besohet se ka qenë në kontakt me të dyshuarin është arrestuar në Vjenë.
Masat policore do të shtohen në rajonin e Vjenës në ditët në vijim, veçanërisht në hyrjet e koncerteve të Taylor Swift, e cila po performon të enjten, të premten dhe të shtunën në Vjenë në kuadër të turneut të saj Eras.
Për çdo shfaqje priten rreth 65 mijë spektatorë. Ruf tha se do të kishte një fokus të veçantë ndër të tjera në kontrollet e hyrjes dhe pjesëmarrësit e koncerteve duhet të planifikojnë pak më shumë kohë.
Shefi i policisë së Vjenës, Gerhard Pürstl, tha se rreziku konkret ishte minimizuar, por duke qenë se ekzistonte ende një “rrezik abstrakt”, do të merreshin masat e nevojshme, me njësi speciale që do të vendoseshin për koncertet.
