Danimarka i dërgon Ukrainës raketa me rreze të gjatë veprimi

Danimarka do ta ndihmojë Ukrainën duke dërguar raketa dhe lëshues raketash “Harpoon” , ka thënë sekretari amerikan i Mbrojtjes Lloyd Austin, pasi 20 vende u zotuan t'i dërgojnë Ukrainës ndihmë të re ushtarake në një takim virtual të hënën.

Njëzet vende të ndryshme, përfshirë Danimarkën, kanë njoftuar se do japin kontribute të reja ushtarake për mbrojtjen e Ukrainës, deklaroi Austin, raporton Reuters.

Vendimi u mor në një takim virtual midis SHBA-së dhe një numri aleatësh, ku fokusi ishte koordinimi i furnizimeve me armë për Ukrainën.

Në një konferencë të mëvonshme për shtyp, Austin falënderoi Danimarkën për kontributin e saj. “I jam veçanërisht mirënjohës Danimarkës që njoftoi sot se do të kontribuojë me raketa dhe lëshues raketash Harpoon për të ndihmuar Ukrainën të mbrojë brigjet e saj”, tha sekretari amerikan i mbrojtjes.

Ministri i Mbrojtjes i Danimarkës, Morten Bødskov refuzoi të jepte detaje mbi dorëzimin e armëve. “Nuk është sekret që ne po i dhurojmë armë Ukrainës dhe këtë po e koordinojmë edhe me SHBA-në dhe Ukrainën, ndër të tjera. Nuk dua të hyj në detaje të mëtejshme për donacionet specifike,” tha ai në një koment me shkrim për DR news.

Megjithatë, kryeministrja Mette Frederiksen konfirmoi se cilat kontribute ushtarake do të dërgojë Danimarka në Ukrainë këtë herë.

"Këto janë disa nga armët që ka kërkuar Ukraina dhe të cilat janë mjaft të rëndësishme në betejën që po luftojnë," tha Frederiksen.

Por nëse Danimarka do të dërgojë raketa dhe lëshues Harpoon në Ukrainë, siç thotë sekretari amerikan i mbrojtjes, do të jetë një raketë me rreze të gjatë veprimi që mund të bëjë shumë dëme.

Sipas ministrisë daneze të mbrojtjes, Danimarka e ka pasur këtë sistem të armëve në arsenalin e saj që nga vitet 1970.