Bisedimet e paqes ShBA-Iran: Negociata intensive në Islamabad ndërsa bota pret rezultatet
Delegacione të nivelit më të lartë nga Shtetet e Bashkuara dhe Irani u takuan ballë për ballë të shtunën në kryeqytetin e Pakistanit, duke shënuar momentin më të rëndësishëm diplomatik mes dy vendeve që nga fillimi i luftës më 28 shkurt.
Nënpresidenti amerikan JD Vance udhëhoqi delegacionin e Uashingtonit, i shoqëruar nga i dërguari special Steve Witkoff dhe dhëndri i presidentit Trump, Jared Kushner.
Nga ana iraniane, delegacioni prej 71 vetash u kryesua nga kryetari i parlamentit Mohammad Bagher Ghalibaf, ministri i jashtëm Abbas Araghchi dhe negociatori i linjës së ashpër Ali Bagheri Kani. Pakistanit iu besua roli i ndërmjetësuesit - kryeministri Shehbaz Sharif dhe shefi i ushtrisë, feldmareshali Asim Munir, ishin të pranishëm në sallë gjatë gjithë bisedimeve.
Negociatat, që sipas CNN, duke cituar burimet pakistaneze, zgjatën deri pas mesnatës dhe mund të vazhdojnë edhe të dielën, hynë në fazën e ekspertëve ku komitete të specializuara për çështje ekonomike, ushtarake, juridike dhe nukleare u ulën përballë njëri-tjetrit.
Faza e parë u mbyll me shkëmbimin e teksteve të shkruara që përshkruajnë pikat kryesore të diskutimit, sipas agjencisë iraniane të lajmeve Fars.
Megjithatë, pikat e mospajtimit janë të dukshme.
Një burim pranë ekipit negociator të Teheranit i tha CNN-it se Uashingtoni ka paraqitur "kërkesa të papranueshme" rreth Ngushticës së Hormuzit dhe disa çështje të tjera. Media gjysmë-zyrtare iraniane Mehr raportoi për "kërkesa të tejkaluara" amerikane, ndërsa agjencia shtetërore IRIB tha se SHBA po merr "një qasje tepër ambicioze në këtë raund bisedimesh."
Në terren, zhvillime tjera të rëndësishme po ndodhnin paralelisht me negociatat. Dy anije luftarake amerikane — USS Frank E. Peterson dhe USS Michael Murphy — filluan operacionin e pastrimit të minave nga Ngushtica e Hormuzit, duke u bërë anijet e para amerikane që kalojnë atë rrugë ujore që nga fillimi i luftës. Katari njoftoi se lundrimi detar do të rifillojë plotësisht të dielën.
Ndërkohë, kryeministri izraelit Benjamin Netanyahu deklaroi se fushata kundër Iranit "nuk ka përfunduar ende," duke renditur si arritje të mëdha vrasjen e udhëheqësisë së lartë iraniane dhe shkatërrimin e kapaciteteve bërthamore dhe raketore. Ushtria izraelite vazhdoi të godasë mbi 200 objektiva të Hezbollahut në Liban, ndërsa Irani insiston që armëpushimi duhet të përfshijë edhe ndalimin e sulmeve izraelite ndaj Libanit.
