Australia do t’ua marrë medaljet veteranëve të dyshuar për krime lufte

Australia do t’ua tërheqë çmimet ushtarake një grupi të veteranëve të luftës për shkak të dyshimeve se ata që ishin nën komandën e tyre kishin kryer krime lufte në Afganistan, tha të enjten ministri i Mbrojtjes, Richard Marles.

Në një hetim 4-vjeçar, të udhëhequr nga Gjeneral Major Paul Brereton, u konkludua më 2020 se kishte të dhëna të besueshme për vrasjen e paligjshme të dyshimtë të 39 njerëzve nga ose duke përfshirë 25 pjesëtarë të Forcës Australiane të Mbrojtjes, si pjesë e një kulture të detyrimit të rekrutëve të rinj për të vrarë të kapur pa mbrojtje, raporton agjencia “Reuters”.

Si pjesë e paraqitjes së rekomandimeve përfundimtare të hetimit, i njohur si Raporti i Breretonit, ministri Marles u kishte shkruar disa oficerëve që kishin shërbyer në Afganistan për t’i informuar se medaljet e dhuruara për shërbim do të tërhiqeshin, tha ai.

“Dyshimet që janë subjekt i Raportit të Breretonit janë në mënyrë të argumentueshme dyshimet më serioze për krime lufte australiane në historinë tonë. Kjo do të jetë gjithmonë çështje e turpit kombëtar” – tha të enjten para deputetëve ministri australian.

Qeveria nuk i ka publikuar emrat e oficerëve që do t’u tërhiqen medaljet ose shifrën e atyre që do të preken nga ky vendim.

Pas rekomandimeve të raportit hetues, 19 pjesëtarë dhe ish-pjesëtarë të ushtrisë australiane u referuan te një hetues i posaçëm për të përcaktuar nëse ka dëshmi të mjaftueshme për ndjekje penale.

Vitin e kaluar, ndaj një ish-ushtari ishte ngritur aktakuzë për krime lufte.

Australia ka marrë pjesë në një forcë ndërkombëtare të udhëhequr nga NATO-ja që ka trajnuar forca afgane të sigurisë dhe ka luftuar kundër talibanëve për dy dekada pas rrëzimit të militantëve nga pushteti më 2001.

Më shumë se 39 mijë trupa australiane kanë shërbyer në Afganistan, ndërsa 41 janë vrarë./Nacionale