Arrestohet një polak, dyshohet për komplot me rusët për vrasjen e Zelenskyt
Një burrë nga Polonia është arrestuar dhe është ngarkuar me akuzën për planifikim të bashkëpunimit me shërbimet ruse të inteligjencës për ta ndihmuar vrasjen e mundshme të presidentit ukrainas, Volodymyr Zelensky, thanë autoritetet polake.
Prokurorët në Poloni thanë se i dyshuari, i identifikuar si Pawel K, dyshohet se ishte ngarkuar me detyrën e mbledhjes së të dhënave për një aeroport në Poloni që ishte përdorur nga presidenti ukrainas, raporton televizioni BBC.
Ata shtuan se arrestimi i këtij personi u bë duke u mbështetur në të dhënat e inteligjencës nga Ukraina. Autoritetet polake nuk treguan nëse burri i arrestuar në të vërtetë kishte dërguar ndonjë të dhënë.
Ai mund të dënohet me deri në tetë vite burgim, nëse shpallet fajtor. I dyshuari është duke u mbajtur i ndaluar dhe hetimi është duke vazhduar.
Përmes një deklarate, prokurorët polakë thanë se dyshojnë që Pawel K ia ka ofruar shërbimet e tij inteligjencës ushtarake ruse. Ai ka kontaktuar rusë “drejtpërdrejt të përfshirë në luftën në Ukrainë”, shtuan prokurorët.
Sipas tyre, i dyshuari ishte ngarkuar me detyrën e grumbullimit të të dhënave për sigurinë në aeroportin “Rzeszow-Jasionka”, që ndodhet në juglindje të Polonisë, jo larg kufirit me Ukrainën.
Para fillimit të pushtimit të plotë rus të Ukrainës, ky ishte aeroport i vogël rajonal, por nga atëherë është bërë qendër kyçe në operacionet për ta furnizuar Ukrainën me ndihma ushtarake perëndimore.
Aeroplanë ushtarakë e të mallrave nga Shtetet e Bashkuara dhe Evropa rregullisht aterrojnë dhe nisen nga ky aeroport për të sjellë dërgesa për kamionët që pastaj lëvizin 100 kilometra deri në kufirin me Ukrainën.