Kronikë e një vrasje të paralajmëruar: Dorëzimi i shtetit para dhunës në familje, 3 muaj burg!

Me vetëm tre muaj burg e kishte dënuar Gjykata e Apelit Astrit Isufin.

Ky i fundit kishte përdorur dhunë të vazhdueshme ndaj gruas së tij, në rastin që dje përfundoi me vrasjen e dy vëllezërve në Malishevë.

Historia e një vrasje të paralajmëruar, pasi që Isufi e kishte kërcënuar bashkëshorten se nëse divorcohet “do t’ia vras krejt familjen”.

Pavarësisht kësaj, Isufi u dënua me 5 muaj burg, e më pas në Apel me tre muaj.

Historia

Kallxo.com ka siguruar dosjen për Astrit Isufin, të dyshuarin për vrasjen e dy vëllezërve në fshatin Gollubovc të Malishevës.

Duke përshkruar veprat recidiviste në dosjen e tij, në një pjesë të dosjes thuhet se i dyshuari e kishte rrahur gruan në ditën e festës së Bajramit dhe kjo përshkruhet – siç e transmeton pjesën e dosjes Kallxo.com, si më poshtë:

Më 30 mars 2025, Astrit Isufi sipas dosjes së gjykatës rreth orës 06:00 të mëngjesit përderisa gruaja e tij e kishte përgatitur drekën e festës së Brajramit, i pandehuri ishte zgjuar nga gjumi e kishte thirrë gruan e tij dhe e kishte goditur me peshqir në trup duke i kërkuar të njëjtës që t’i zgjoj fëmijët nga gjumi.

Gruaja kishte shkuar të fëmijët por ata nuk ishin zgjuar e ishte kthyer sërish te Astrit Isufi për t’i treguar. Dosja që ka siguruar KALLXO.com tregon se Astrit Isufi ishte nervozuar e më pas kishte nisur ta sulmoj gruan e tij me shuplakë e grushte në fytyrë e trup.

Disa orë më vonë, kur Astrit Isufi ishte kthyer në shtëpi pasi kishte shkuar të përshëndes familjarët për festën e Bajramit, kishte kërkuar ushqim nga gruaja e tij dhe kjo e fundit i kishte thënë se mungonte një produkt ushqimor e kjo më pas sërish kishte qenë një sherr i cili shkaktoi dhunën fizike të dytë brenda ditës nga Astrit Isufi te bashkëshortja e tij.

Dosja shpjegon se kur kishte marrë vesh Astriti se mungon një produkt, i kishte marrë pjatat e ushqimit dhe i kishte gjuajtur në tokë e më pas e kishte kap gruan e tij për dore e kishte tërhequr zvarrë e kishte futur brenda dhomës dhe kishte nisur ta qëlloj me një kabllo të rrymës në pjesë të ndryshme të trupit.

Në ato momente vajza e tyre kishte hyrë brenda dhomës dhe i kishte kërkuar babait të saj të ndaloj sepse ‘po e mbyste nënën’.

Ani pse kishte kërkesë nga vajza, dosja shpjegon se Astrit Isufi nuk kishte ndaluar deri sa i është dukur mjaftueshëm se e ka rrahur të dëmtuarën në këtë rast gruaja e tij dhe më pas e kishte larguar nga shtëpia.

Në po të njëjtën ditë, Astrit Isufi sipas dosjes që ka siguruar KALLXO.com e kishte kërcënuar gruan e tij dhe e kishte paralajmëruar se nëse ndahet nga ai do t’ia vrasë gjithë familjen.

Ti nuk guxon me u nda me mua, se ka me ta vra familjen, ka me t`i faru krejt”- përshkruhet kërcënimi që i kishte bërë Astrit Isufi, gruas së tij më 30 mars 2025.

Kjo situatë të njëjtës i kishte shkaktuar ankth, frikë dhe pasiguri për jetë.

Më krejt këto veprime që Astrit Isufi kishte kryer ndaj gruas së tij, Gjykata në Prishtinë- Dega në Drenas, kishte dënuar të njëjtin me burg në kohëzgjatje me 154 ditë dhe 300 euro gjobë për dhunë në familje ndërsa për kanosje ishte gjobitur me 500 euro.

“Dilnum prej lokali se iu vras”: Astrif Isufi i kishte kanosur dy vëllezërit në prill, u dënua me gjobë

Në muajin prill të këtij viti, Astrit Isufi, i dyshuari për vrasjen në Malishevë, i kishte kanosur dy vëllezërit.

Kjo disa ditë pasi Isufi kishte ushtruar dhunë ndaj motrës së tyre, pra bashkëshortes së tij.

Ngjarja kishte ndodhur më 5 prill të këtij viti, vetëm gjashtë ditë pasi i dyshuari ishte denoncuar për rrahjen e bashkëshortes së tij, motrës së të dëmtuarve. 11 ditë më vonë, për rastin e dhunës në familje, Astrit Isufi do të dënohej me 154 ditë burgim e 800 euro gjobë nga një gjykatë e shkallës së parë, raportoi sot Betimi për Drejtësi.

Sipas aktakuzës së ngritur nga prokurori i Prokurorisë Themelore në Prishtinë, Paulin Pashku, vrasësi i dyshuar Astrit Isufi dhe vëllai i tij Petrit Isufi i kishin kanosur seriozisht me dashje dy anëtarë të familjes së miqve pas një konflikti verbal.

“I akuzuari Astrit Isufi iu ishte drejtuar me fjalë të dëmtuarve ‘dilum nga lokali se ju vras dhe kini afat deri të shkoni në shtëpi, sepse si te shkoni ne shtëpi unë do t’iu vrasë’, kurse i akuzuari Petrit Isufi iu ishte drejtuar me fjalët ‘dilni jashtë se ju vras’”, thuhet në aktakuzën e Prokurorisë Themelore në Prishtinë, raporton Paparaci.

Astrit Isufi dhe vëllai i tij e kishin pranuar fajësinë për kanosje që në seancën fillestare të rastit në Gjykatë, sipas dosjes së Gjykatës.

Prokurori Pashku i kishte propozuar Gjykatës që pranimi i fajësisë nga dy të pandehurit të merrej si rrethanë lehtësuese, të cilën Gjykata e kishte marrë parasysh.

Kësisoj, vëllezërit Isufi i kishin shpëtuar një dënimi maksimal deri në një vit burgim për veprën penale të kanosjes. Ishin dënuar me 200 euro gjobë, tregojnë shkresat e lëndës.

“Të akuzuarve Astrit Isufi dhe Petrit Isufi, secilit veç e veç, në shumë prej 200 (dyqind) €, të cilin do të e paguajnë në afat prej 15 ditë, nga dita e plotëfuqishmërisë së këtij aktgjykimi”, thuhet në aktgjykimin e Gjykatës Themelore në Prishtinë, të shpallur më 19 shtator të këtij viti.