Zyrtare: Eden Hazard pensionohet nga Kombëtarja e Belgjikës

Ylli i Real Madridit, Eden Hazard, i ka thënë fund futbollit ndërkombëtar, duke u pensionuar nga Kombëtarja e Belgjikës, e pasuar nga një paraqitje e keqe e tërë skuadrës në Botërorin e Katarit, ku u eliminuan në grupe.

Hazard që nga transferimi i tij nga Chelsea në Real Madrid, nuk ka kaluar nëpër kohë të mira, duke u përballuar me lëndime të shumta dhe asnjëherë nuk arriti ta tregojë potencialin e tij të plotë.

Ndonëse te mbretërit luajti shumë pak, në kombëtaren belge ai ishte kapiten dhe startoi në dy nga tri ndeshjet e zhvilluara në grupe.

Belgjika dëshpëroi, duke u pozicionuar në vendin e tretë, pas liderit Maroku dhe vendit të dytë Kroacisë, të dy skuadrat u kualifikuan në çerekfinale.

Kjo formë e dobët e tyre nuk ishte shumë befasi, për shkak të gjeneratës së vjetër që patën në grumbullim, madje gjatë ndeshjeve të para të grupeve ishin skuadra më e vjetër në fushë në bazë të moshës mesatare.

Krejt kësaj i parapriu edhe prishja e raporteve në skuadër, ku ishte i përfshirë vetë Hazard me Leandro Trossard, Jan Vertonghen e Kevin De Bruyne, ndërsa si ndërmjetësues ishte Romelu Lukaku për të qetësuar gjakrat.

31-vjeçari që kur bëri debutimin e tij me kombëtaren e Belgjikës, u paraqit në 126 ndeshje, me karakter garues dhe jo-garues. Në përgjithësi bëri 126 paraqitje duke shënuar 33 gola e asistuar në 36 raste tjera.

Hazard tani do të kthehet në Real Madrid, por me shumë gjasë edhe atje do të jetë sezoni i fundit i tij, pasi ka dështuar vazhdimisht të tregojë atë se për çfarë është transferuar.