Zbulohet paga dhe data e debutimit të Lionel Messit me Inter Miami
Fituesi i Kupës së Botës, Lionel Messi, do të debutojë me skuadrën e re më 21 korrik, siç është mësuar nga pronari menaxhues i klubit Inter Miami, Jorge Mas. Ndër të tjera është mësuar edhe rroga e çmendur që pritet ta fitojë në një sezon 35-vjeçari.
Në një intervistë për Miami Herald, Mas tha se argjentinasi ndeshjen e parë që do ta luajë për skuadrën e re është në kuadër Kupës së Ligës kundër Cruz Azul. Ndeshja është caktuar të luhet në DRV PNK Stadium, stadium ky i përkohshëm i Inter Miamit, deri në gjetjen e një stadiumi të përhershëm.
Mas tha se klubi synon të ketë një stadium të përhershëm deri në vitin 2025. Kontrata e Messit është për dy vjet e gjysmë, që do të thotë se ai mund të luajë në stadiumin e ri. Ndërkohë, pronari menaxhues tha se stadiumi DRV PNK do të përmirësohet.
"Ne kemi kontraktuar tashmë për të mbushur qoshet e stadiumit që duhet të rrisin kapacitetin me afërsisht 3,000 deri në 3,200 vende [në një kapacitet prej rreth 22,000 ulëseve]," tha ai. “Ne jemi duke u përgatitur për ta bërë atë punë në katër javët e ardhshme. Çdo lojë, biletat do të shiten. Kërkesa për bileta ka qenë 10 herë më shumë se sa ne mund të përballojmë në bazë të biletave sezonale.”
Herald raportoi se kontrata e Messit kap vlerën e 50 milionë dollarëve deri në 60 milionë dollarë në vit dhe do të përfshijë pagën, shpërblimet dhe kapitalin në klub pasi ai të pensionohet. Messi hodhi poshtë ofertat nga Barcelona dhe Al Hilal i Arabisë Saudite për t'u bashkuar me Inter Miami. Sipas disa raportimeve, marrëveshja me Arabinë Saudite ishte me vlerë 400 milionë dollarë në vit.
Mas tha se beson se Messi do të ndihmojë MLS të bëhet një nga ligat kryesore në botë.
“Unë mendoj se do të ketë gjithmonë një para dhe pas Messit kur flasim për sportin në Shtetet e Bashkuara,” tha ai. “Unë kam një besim shumë, shumë të fortë se ne mund të krijojmë në Amerikën e Veriut dhe Shtetet e Bashkuara, nëse jo ligën më të madhe, një nga dy ligat më të mira në botë.”
Ai tha se është i vetëdijshëm për entuziazmin e tifozëve rreth ardhjes së Messit dhe klubi synon të rrisë sigurinë rreth ndeshjeve, ku shtatë herë fituesi i Topit të Artë do të paraqitet.
“Siç mund ta mbani mend, Argjentina u stërvit në Miami përpara se të fluturonte për në Doha [për Kupën e Botës të vitit të kaluar],” tha ai. “Aty ku ne patëm një mundësi për të parë disa nga çmenduritë e Messit në dyert tona në baza të përditshme gjatë stërvitjes. Pra, ne jemi shumë të përgatitur. Ne jemi përgatitur për këtë.”
